Президент принял представників ріжных віроісповідань та членів СКУтНіЕМ

23. січня/януара Президент Польской Республикы Анджей Дуда і Перша Дама Аґата Корнгаузер-Дуда витали в президентскым палаци представників Церкви і конфесийных звязків в Польщы. Участ в стрічы взяли тіж представникы меншын – члены Спільной Комісиі Уряду та Нацийональных і Етнічных Меншын.

«Дякую Вам, што спілтворите наш нарід через свою присутніст, штоденну працу і духову службу для Родаків» – бесідувал А. Дуда вчас стрічы. Президент підчеркнул, што польскій нарід то спільнота люди, якы Польщу трактуют як свою отчызну, любуют єй традицию і вшытко тото, што польскє, незалежно од походжыня, етнічных коренів, конфесиі, ідеалів.

Стріча в президентскым палаци є уж традицийом – каждого рока на запрошыня президента представникы віржных віроісповідань, а тіж нацийональных і етнічных меншын сут прошены до участи в спільній подіі. Президент Дуда в своій промові дякувал за толеранцию і спілодповідальніст. Навязал до войны на Украіні – коли то польскы громадяне неєднократно принимали до своіх хыж украіньскых біженців, даючы тым самым доказ на братерску любов, не звідуючы, кым є друга особа і одкале приходит.

Вчас подіі голос забрали представникы парох віроісповідань (кард. Казімєж Ныч, митрополита варшавскій римокатолицкого Костела, єп. Анджей Маліцкій, Презес Польской Екуменічной Рады, Мішель Шудріх, Начальный Рабін Польщы, і Томаш Міскєвич, Ведучый Мусульманьского Реліґійного Звязку в Польскій Республиці. Православну церков репрезентувал митрополита варшавскій і цілой Польщы Сава і архієпископ Юрий, владыка вроцлавско-щеціньской єпархіі ПАПЦ, Православный Ординарий Польского Войска. Грекокатолицку церков репрезентувал владыка Аркадий, єпископ ольшыньско-ґданьскій УГКЦ.

Вчас подіі як репрезентант меншыновой страны голос мал Григорий Куприянович, спілведучый СКУтНіЕМ. Куприянович своє выступліня зачал од навязаня до тырваючой войны на Украіні. Дальше підчеркнул, што нацийональны і етчнічны меншыны в Польщы з надійом, але і боязню входят в Новый 2024 Рік. «Як вшыткы, ждеме законопослухняной і демоктратичной державы, в котрій будут цінены тіж права і потребы меншын, а є вельо в тій обшыри до зробліня» – бесідувал Куприянович.

Спілведучый Комісиі бесідувал і о проблемах німецкой меншыны в обшыри едукациі. Дальше навязал до недавного рішыня Інситуту Нацийональной Памяти вс. ремісиі слідства о акциі Вісла і подаваных ІНП арґументів. «Єдным з нерозрахуваных комуністичных злочынів, тіж в правным контексті, єст акция Вісла, яка была брутальном, пацифікацийном выселенчом акцийом, вечедом подля нацийональной критериі. Ґрупы, якы досвідчыли того комуністичного злочыну, барз заболіло скандаличне поясніня рішыня прокуратора ІНП о ремісиі слідства в справі акциі Вісла» – пояснил перед згромадженыма.

Дальше Куприянович спомнул м.ін. о тым, што православны в Польщы в текучым році припоминают 100. річницю автокефалиі. Бесідувал і потребі молитвы о мир на світі. Відеореляцию з подіі найдете за тым мотузком.