Придбайте промоцийны білеты на VI Русиньскій Фестіваль во Свиднику

Згідно з практиком орґанізаторів Русиньского Фестівалю во Свиднику, од початку марця (од минулого четверга) мож уж купити промоцийны білеты на тогорічну едицию найбільшого свята русиньской культуры. VI Русиньскій Фестіваль во Свиднику пройде в днях 21.-27. мая 2018 р.

Білеты на подію в передпродажы сут туньшы і іх ціна на днес то 4 евро. В порівнаню до влонишньой ціны то о єдно евро веце, але обєктивно смотрячы на высокій рівен Русиньского Фестівалю і великє чысло выступуючых, є то і так невеликій выдаток. Порівнуючы з інчыма, планно зорґанізуваныма фестівалями, свидницкій то подія, на котрій што рока мож стрітити новы атракциі і шор товаришучых акций. Жебы придбати білеты по 4 евро, треба ся спішыти, така ціна буде лем до кінця марця т.р.

Од квітня/апріля за вступне на VІ Русиньскій Фестівaль заплатиме 6 евро, а од 1. мая треба буде дати уж 10 евро. Припоминаме, же ціна білету обнимат три дни подіі, 25.-27. мая 2018 р. (пятниця-субота-неділя), што буде проходила в свидницкым амфітеатрі.

Головний орґанізатор фестівалю, якым є Окресна Орґанізация Русиньской Оброды во Свиднику, оголосил дотепер лем вечeрні звізды трьох фестівальовых дни. В пятницю запрезентує ся ґрупа No Name, в суботу выступит Kristína, a завершыньом тогорічного Русиньского Фестівалю во Свиднкику буде концерт Vašа Patejdl.

Кєд лем явит ся детальний проґрам фестівалю, будеме о ним інформувати. Напевно не бракне в ним знаных русиньскых народных ґруп, русиньскых солистів і гостів з заграниці.

Русиньскій Фестіваль окрем ґальовых концетрів то тіж дальшы подіі, якы проходят цілий тыжден (21.-27.05). В попередніх роках презентуваны были і выдавництва, выставы, дітячы выступы, пєсы єдиного професийного русиньского театру во світі – Театру Александра Духновича з Пряшова, а влони прошло шов Miss World Rusyn – Найкрасша Русинка.

Медияльна Ґрупа ЛЕМ.фм, попри інчых русинькых і нерусиньскых медиях, дальший рік буде тримала медияльний патронат над подійом, што радо робиме, передаючы нашым слухачам і чытачам вшыткы інформациі о приближаючым ся фестівали.

Білеты в промоцийных цінах можете купувати за тым мотузком. Заохочаме слідити заєдно фейсбуковий фанпейдж фестівалю, на котрым являют ся деякы конкурсы, в котрых мож выграти м.ін. дармове вступне, та офіцийний інтернетовий сайт.