Про лемківску поезию і православя – в віторок в TVP2

Заран, в віторок, 2. лютого/фебруара 2021 р., о год. 6:55 в проґрамі TVP2 буде емітуваный репортаж посвяченый творчости Петра Мурянкы. Фільм зрыхтувала Екуменічна Редакция польской телевізиі.

Репортаж під назвом «Православный поета» буде оповістю про єдного з найвыдатнійшых сучасных лемківскых поетів і діячів. Петро Трохановскій окрем роботы на ниві культуры од вельох років активно діє на благо православной Церкви. Прожыват в Креници, де при місцевій православній парохіі св. Владиміра Великого веде церковный хор. Хоц наголовок репортажу вказує на православя, в великій мірі буде він посвяченый і русиньскій культурі.

Як поета і артиста знаный єст од років під псевдонімом Петро Мурянка. Веде журналистичну діяльніст, окрем того долгы рокы вчыл лемківскы діти рідного языка, реліґіі і церковного співу. В вітірковым репортажу дознати буде ся мож як раз веце про обі сферы дільности Петра Трохановского – Мурянкы.