Про Мацину і Розділя, о млині і корчмі, о Німцях, кубаньскых козаках і каґєбистах – 70 процент – субота, 20.00 год.

На знимці ― Ольга і Василь Дзямы, а сонечнык пред нима ― то доправды салата, яку зрыхтували до приходу кореспонденткы радия Руской Бурсы – Лем.фм. Нич зачали сме гостити ся, нич принесли інчы смакоты, то можете послухати, бо бесідуєме о давных часах, о Лемковині.

Пан Василь оповідат про рідну Мацину, про добываня там ропы, про своіх родичів (на фото они горі), о тым, як його тато в часі І Світовой Войны нашол ся аж на Кубани, як старал ся долучыти Лемковину до Чехословациі, і што з того вышло. Пані Ольга Дзяма, з дому Пыж, тіж оповідат о своіх родичах (они сут на знимці долов), о корчмі в Розділю, яку тримал єй дідо (і корчма єст на знимці),  а і о радяньско-американьскій спілпрацы в справі досліджыня Космосу.

Вшытко ся діє в маленькым місточку Винникы коло Львова, де замешкали і Лемкы. І кадиль лемківскым кореспондентам вартат іщы не раз прити…