Проблем з терміном матур?

В будучым шкільным році 2023/2024, котрый зачне ся зараз по вакациях, може дойти до колізиі термінів другого дня Великодня 2024 подля юлияньского календаря і першого дня матурального еґзаміну 2024. В тій справі інтервеніювал Григорий Куприянонич зо СКУтНіЕМ.

Спілведучый Спільной Комісиі Уряду та Нацийональных і Етнічных Меншын Григорий Куприянович скєрувал писмо до директора Центральной Еґамінацийной Комісиі Марціна Смоліка в справі терміну матурального еґзаміну 2024 в звязку з можливом колізийом термінів другого дня Великодня подля юлияньского календаря і першого дня матурального еґзаміну.

Квестия тота єст барз важна для меншыновых соспільности в Польщы, котры хоснуют в своім реліґійным жытю юлияньскій календар, м.ін. для вірных православной ци грекокатолицкой Церкви. Терміны матуральных еґзамінів вызначаны сут переважно на першы дни по долгым майовым вікенді – міг бы то быти в 2024 р. понедільок 6. мая, што бы колідувало з Великодньом, котрый за юлияньскым календарьом припадат в будучым аж 5. мая, а 6. і 7. мая то святочны дни. Зато спілведучый Спільной Комісиі Уряду та Нацийональных і Етнічных Меншын звернул ся з внеском до ЦЕК взяти до увагы тот факт при усталяню терміну матуральных еґзамінів в 2024 р.

Пересуніня не буде?

Початком серпня/авґуста тр. директор ЦЕК Марцін Смолік однюс ся до проблему в одповіди на писмо Г. Куприяновича і заґарантувал взяти до увагы проблем дат. Подал, што тепер тырвают роботы над рыхтуваньом інформаций о принципах орґанізуваня і ведіня еґзамінів в 2024 році та комунікатів, в тым комунікату про гармоноґрам іспытів. В своій одповіди директор не подал єднак ци терміны фактичні останут пересунены.

Справа є барже зложена, бо опізніня початку матур спричынит дальшы пересуніня. «Центральна Еґамінацийна Комісия бере до увагы ріжны условія і потребы ріжных ґруп і середовиск, а тіж уклад календаря в 2024 році (пересуніня терміну початку еґзаміну в головным терміні спричынит пересуніня терміну выданя матуральных свідоцтв і влият на процес рекрутациі до высшых шкіл)».

Директор заґарантувал взяти до увагы потребы вірных святкуючых за юлияньскым календарьом. «Хочу (…) заґарантувати, што ЦЕК в остаточно принятым розвязаню забезпечыт потребы здаючых – вірных православной Церкви, грекокатолицкой Церкви в Польщы та Східньой Старообрядовой Церкви і Староправославной Церкви Старообрядовців» – подає в писмі Марцін Смолік, директор СЕК.