Проґрам Театру Александра Духновіча в Пряшові на місяць новембер 2019

Приносиме вам проґрам Театру Александра Духновіча в Пряшові на місяць новембер 2019-го року.
4-го новембра 2019

Златый ключік (Велика сцена, 9.15 год.)

Буратіно, головный герой приповідкы Алексія Толстого Златый ключік або Буратіновы авантуры, то жываньска, непослухняна і неконечно зведава, но наперек тому сімпатічна деревяна лялька із довгым носом, котрый як кібы быв на тото, жебы го маїтель пхав там, де не треба. Буратіно має ніс, котрый вынюхать кажду авантуру, небезпеку, но і способ, як із того добрі выйти, і не лем то – поможе му найти то, по чім вшыткы тужыме – златый ключік, котрым дають ся одкрыти двері до щастливого жывота… 

6-го новембра 2019

Познатый непознатый (Homo sapiens) (Велика сцена, 19.00 год.)

Homo sapiens, чоловік розумный, як сьме самы себе пышно назвали, є безпохыбно найнасилнішым сотворіньом на планеті. Докажеме єй іщі уратовати? Докажеме уратовати самых себе, кедь ани зданя не маєме, хто сьме? На основі чого вырішуєме? Одкыль і де крачаме? Насилство нас проводить од початку і не здасть ся, же бы ся рихтовало счезнути. Насилство лежыть в сердці людьской културы і в сердці каждого єдного з нас. Были бы сьме то іщі все мы – без насилства? Без културы? Без жертв? Без священого? І хочеме досправды знати правду?

11-го новембра 2019

Медовникова хыжка (Велика сцена, 10.00 год.)

Янка і Марьку выгнала із дому ненависть і хытрацьтво мачохы. Простодушный няньо їх завів до густого ліса, де діти зістали самы. Ліс скрывать темну солодку таємніцю, дословно. Медовникову хыжку, в котрій жыє зла Баба-Яґа. Но діти знають вынайти ся і суть смілы, кедь мають тугу вернути ся безпечно домів. Приповідка о тім, же солодше як будькотрый медовник є чувство смілости і любви.

13-го новембра 2019

Златый ключік (Велика сцена, 11.00 год.)

13-го новембра 2019

Пісковиско (Мала сцена, 19.00 год.)

Коли доростаме? І што то властно дорослость є? І є властно жадана в добі гіперреаліты, коли уж не мож точно повісти, што є досправдове і што фіктівне? Коли перебераме зодповідность за властны чіны? Докажеме дати явно знати свої чувства? Тужыме іщі по тырвалых односинах? Не сьме і в дорослости все дітми і в дітинстві дорослыма? Суть ВІН і ОНА іщі досправдовы, або то вже лем знакы у віртуалнім світі? Найліпша пєса (гра) 21-го столітя про двох акторів (грачів).

16-го новембра 2019

На ревізію (Велика сцена, 19.00 год., в рамках події Ніч театрів)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

20-го новембра 2019

Златый ключік (Велика сцена, 9.30 год.)

20-го новембра 2019

Москва – Петушкы (Мала сцена, 19.00 год.)

Твор Москва – Петушкы Венедікта Єрофеєва є часто означованый як роман-поема, і бере ся за ключовый твор російской постмодерны. Історія є барз проста: Венечка ся зобудить скоро рано по перепитой ночі на ґарадічах московского панелаку, напитый у весмірных параметрах. Но вырішыть, же навщівить свою любов в Петушках, містечку далекім дакілько годин влаком. Почекать, покля одкрыють першы склепы, накупить деякы предметы, котры треба ку пережытю (або скоріше ку непережытю) той драгы… І іде ку желізнічній штації. Наступить до влаку і… Дійде до ціля свойой драгы? Не дійде? То вже не повіме… Біблія алкоголіків, так є тота поема часто і правом называна. І зато, же алкоголіци цілого світа суть братя, бо їх звязує тот найсилнішый звязок, творцьове собі дозволили позмінити підназву інсценації на „біблія алкоголіка“.

27-го новембра 2019

Познатый непознатый (Homo sapiens) (Велика сцена, 19.00 год.)


Выступліня ТАД мімо Пряшів
7-го новембра 2019

Медовникова хыжка (Културный дім Свідник, 10.00 год.)

8-го новембра 2019

Окресный шпыталь (Културный дім Свідник, 18.00 год.)

Чоловік ся ани не сподівать і зразу ся дізнать, в якім жыє маразмі. Невыразно то припоминать шаленый дім. Має лем дві можливости! Сплынути з оточіньом, або спробовати дістати ся вонка. Є дакілько драг: зміна індентічности, еміґрація, і кедь нереална, так холем до свого внутра. Можливость не прияти жывот є основов, но не найприємнішов. Умерти на старобу, хоць є природне, но хто бы так довго чекав… Револуція? Може, але має смысел револуція в шаленім домі?

9-го новембра 2019

Обіцянкы (Културный дім Валентівці, 16.00 год.)

Театер Александра Духновіча пєсов Тайовского Обіцянок має намагу надвязати на драматурґічну лінію обявного інсценованя словацькых класічных творів у русиньскім културнім контексті, в режійнім наштудованю Матуша Ольгы. Тайовскый пєсу написав у 1898-ім році і выдав єй за властны грошы, жебы в часі мадярізації дав словацькым охотникам пєсу в материньскім языку, котру бы могли зробити і в рамках скормных условій. Днесь театер посередництвом того тексту хоче публіці демонштровати театралну інсценацію як твориву роботу інсценаторів.

21-го новембра 2019

Медовникова хыжка (Културный дім Орябина, 10.30 год.)

22-го новембра 2019

На ревізію (Културный дім Стащін, 18.00 год.)

24-го новембра 2019

Фараоны (Културный дім Меджілабірці, 15.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і навспак. Што ся стане, кедь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Повязаны дописы

Коментарі

Польковиці 103,8 МHz
Ґорлиці 106,6 MHz