Проґрам Театру Александра Духновіча в Пряшові на місяць май 2018

2-го мая 2018

Тяпаковці (Велика сцена, 19.00 год.)

Дія славной драматізації прозаічной предлогы вызначной словацькой писателькы з епохы крітічного реалізму Божены Сланчіковой – Тімравы вас перенесе до минулости, на село, до дому великой родины Тяпаковців, котра є прославлена тым, же є лінива і не має дяку будьшто робити. Інсценація жыво, з легкостьов, забавно але з ідейнов глубков підкреслює потребу освободити ся од наносів минулости на благо будучности, котра ся основать на старых пілірах, но не сміє їх зохабити цалком спустнути. Жывот ся мусить жыти!

9-го мая 2018

Адолф Івановіч Добряньскый – Зоря на небі, над головов штранґ (Велика сцена, 14.00 і 19.00 год.)

Фраґменты зо жывота вызначного русиньского будителя. Пєса дотулять ся головно аспектів великодержавной політікы різных европскых прямовань в 19-ім столітю, котры із нашого погляду являють ся як млиньскы каміня на роздробліня малых народів і народностей.

16-го мая 2018

„Кохання у стилі бароко, або любов з неохоти“ (пєса в україньскім языку, Велика сцена, 19.00 год.)

Ці може ґрофскый псярь нараз перемінити ся на свого пана і ґроф на страшка, ґрофка стати служніцьов і локай зневажовати свого пана на його приказ? Може. Кідь то про любов. Не вірите? Потім прийдьте пересвідчіти ся на рождественну приповідку про дорослых. Любов у штілі бароко.

23-го мая 2018

Фараоны (Велика сцена, 19.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і навспак. Што ся стане, кідь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

28-го мая 2018

Тяпаковці (Велика сцена, 9.00 год.)

30-го мая 2018

Ізба ч. 6 (Велика сцена, 19.00 год.)

Ошарпаный павілон на краю шпыталю десь в російскій ґубернії. Тримають в нім тых, котры в реалнім жывоті не фунґують нормално. Котрых справованя не є полдя норм. Суть мімо нашой реаліты. Як кібы были забытыма ролями з якыхсь стародавных пєс… Не робить ся ту терапія, нихто їх нияк не лічіть. Павілон скоріше припоминать тюрму як санаторію. Веде го лікарь Андрій Єфіміч, резіґнованый, котрый пахтить по свободі, пересвідченый о тім, же вшыткы людьскы страсти суть без значіня в одношіню ку вічности. Єдного дня пустить ся до бісіды із паціентом Іваном Дмитрійовічом Ґромовом. Андрія Єфіміча очарить запаліня, котре іщі є в Ґромовови, присвоїть собі його приготовленость змінити тоты обставины. Оцінить його тугу: просто жыти. В єднім моменті зачне лікарь навщівльовати паціентів частіше. І в санаторії зачне ся бісідовати. О людьскых тугах, о ненаповненых снах і ідеалах, любвах, намірах, жывотных очекованях… О промарненых жывотах. На світло світа выходять скрыты токы людьскых інштіктів. Ізба ч. 6 чутливо і прозірливо дотулять ся вопросів вины і зодповідности, хворомысельности в сполочности, тілесности і метафізікы. Ненаповнительности людьской долі. Пєса дає до взаємного балансу думку і сценічный образ збудованый на богатій фантазії, сценічній поезії, візуалній імаґінації і неочекованости до себе запасованых сітуацій.

Выступліня ТАД мімо Пряшова:

6-го мая 2018

Фараоны, Културный дім Вышня Ядльова, 16.00 год.

12-го мая 2018

Гавай, Културный дім Меджілабірці, 17.00 год.

Гавай є дебутом пряшівской драматічкы Михаелы Закутяньской. Траґікомедія з русиньского села із характерістічнов назвов Гавай – то є оповіданя о гляданю самого себе на періферії Европы і в кругу не цалком тіпічной родины.

13-го мая 2018

Окресный шпыталь, Културный дім Словінкы, 15.00 год.

Чоловік ся ани не сподівать і зразу ся дізнать, в якім жыє маразмі. Невыразно то припоминать шаленый дім. Має лем дві можливости! Сплынути з оточіньом, або спробовати дістати ся вонка. Є дакілько драг: зміна індентічности, еміґрація, і кідь нереална, так холем до свого внутра. Можливость не прияти жывот є основов, но не найприємнішов. Умерти на старобу, хоць є природне, но хто бы так довго чекав… Револуція? Може, але має смысел револуція в шаленім домі?

19-го мая 2018

Фараоны, Културный дім Нижній Комарник, 17.00 год.

20-го мая 2018

Фараоны, Културный дім Крайнє Чорне, 14.00 год.

22-го мая 2018

Тяпаковці, Културный дім Свідник, 19.00 год.

27-го мая 2018

Фараоны, Културный дім Грабске, 15.00 год.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА