Проґрам Театру Александра Духновіча в Пряшові на місяць марец 2022

Приносиме вам проґрам Театру Александра Духновіча в Пряшові на місяць марец 2022-го року.

2-го марца 2022

Любов до ближнього (Велика сцена, 19.00 год., 2-га премєра)

Театер Александра Духновіча представлює інсценацію од єдного із найзнамішых російскых драматіків 20-го столітя Леоніда Николаєвіча Андреєва. Тота комедія вказує на абсурдность нашого світа і нонсенс жывота, де трафунковы поставы чекають на смерть нещастливця коло вычапу і страчають чутя і любов до ближнього.

4-го марца 2022

Ани мак (Велика сцена, 19.00 год.,)

Зуна, іншпірована геройков із роману Франтішка Швантнера під назвов Невіста полонин, воює із стереотіпами одношіня чоловіка 21-го столітя ку природі. Як змінили ся односины чоловіка і природы, і як овпливнила ґлобалізація наше (нелем) енвіроманталне оточіня? Вкаже му путь вонка із цілый час прискорюючого ся і неутримательного колобігу? Лиця нам освітлює світло екрану і природа нам счезать перед очами. Забываме на то, же якраз она є нашов частьов. Ці конзум є правилна путь? Є профіт основнішый як охорона нашой природы? Жывота? Мате обще час… жыти ту?

9-го марца 2022

Фараоны (Велика сцена, 19.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і наопак. Што ся стане, кедь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

11-го марца 2022

12 стілців (Велика сцена, 19.00 год.)

Рафінована карікатура совітьской сістемы і людьского ненажерства ся злучує в історії Іпполіта Воройбанинова і великого комбінатора Остапа Бендера, котрых наганяня ся за скарбом приведе до різных небезпечных і комічных сітуацій.

16-го марца 2022

Любов до ближнього (Велика сцена, 19.00 год.)

18-го марца 2022

Детектор лжи (Велика сцена, 19.00 год.,)

Повісте собі, же о манжелстві знате вшытко? Досправды то так є? Або… може о манжелстві не знаме абсолутно нич? І манжелство може быти єдна велика незнама… А притім прекрасна комедія! Находиме ся в обывачці єдного класічного панелакового квартелю. Пані Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити справы, котры суть на першый погляд баналны. А пізніше і фаталны. Бо уж по хвілі знайде ся меджі небом і земльов. Ліпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого ціложывотного партнера? Нихто. І втогды ся іщі лем почнуть діла! Минулость шокує нашых героїв, метать їх до неочекованых сітуацій. Но публіка ся барз файні бавить! Та ці то в жывоті аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподіванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавліню ся. На дінаміці акторьской кооперації, іскривости словных несподіванок. Значіть! Театралный вечур повный доброй забавы, усміху, котрый вам з часу на час замерзне на роті, сміху і радостного обчутя ся може зачати!

23-го марца 2022

Тяпаковці  (Велика сцена, 19.00 год.)

Дія славной драматізації прозаічной предлогы вызначной словацькой писателькы з епохы крітічного реалізму Божены Сланчіковой – Тімравы вас перенесе до минулости, на село, до дому великой родины Тяпаковців, котра є прославлена тым, же є лінива і не має дяку будьшто робити. Інсценація жыво, з легкостьов, забавно але з ідейнов глубков підкреслює потребу ослободити ся од наносів минулости на благо будучности, котра ся основать на старых пілірах, но не сміє їх зохабити цалком спустнути. Жывот ся мусить жыти!

25-го марца 2022

Домашнє гніздо (Велика сцена, 19.00 год.,)

Комедія о нас і справах, котры нас роблять тым, кым сьме: нашых родічах, нашых любвах, нашых несповненых снах і о тых, котры наповнили ся, хоць сьме ани не надіяли ся на тото, о надії – бо будьяк кліше і спрофанована є, все вмерать послідня, ці ся нам то любить, ці ніт. Комедія нелем о Русинах і Выході, а о каждім (і про каждого), хто колись мусив вернути ся домів, хто колись з дому хотів втечі, хто даколи у своїм жывоті холем на даякый час став частьов даякого домова і взяв на себе дакотру роль: родіча, дітины, сородника, мужа…

30-го марца 2022

На ревізію (Велика сцена, 19.00 год.,)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА