Проґрамовы пріоріты обсягують і пункты о меншынах

На Словакії ся по парламантных выборах, котры проходили 5-го марца 2016, формує нова влада. Покля ся нич не змінить, творити бы єй мали насилніша партія соціалных демократів SMER – SD, націоналістічна SNS (Slovenská národná strana), партія Most-Híd і партія Sieť.

Партії їднали о проґрамовых пріорітах влады Словацькой републікы на рокы 2016 – 2020, до котрых партія Most-Híd протисла і пункты о народностных меншынах. Із пріоріт, на котрых ся партії формуючі нову владу доїднали 15-го марца, бы мав выникнути владный проґрам, з котрым нова влада буде жадати о довіру депутатів у словацькім парламенті.

Вшыткы пункты, котры дотуляють ся народностных меншын, были пропозіційов партії Most-Híd. В проґрамовых пріорітах є написано, же ся у функчнім періоді новоформуючой ся влады прийме закон о вытворіню фонду про фінанцованя народностных култур, котрый бы мав быти верейноправным фондом. Так само партія Most-Híd протисла до пріоріт, жебы ся згармонізовала практіка із платным законом о хоснованю языків народностных меншын. Нова влада бы подля приятых пріоріт мала змінити і методіку навчаня словацького языка на меншыновых школах з тым, жебы го діти на тых школах ліпше знали. Тот пункт дотулять ся головно школ з навчалным языком мадярьскым, кідьже Most-Híd давно вказовав на то, же методіка навчаня словацького языка мадярьскых дітей є зла і запричінює то їх слабе знаня того языка.

Може найголовнішов схваленов пріорітов, котра бы мала быти і у новім владнім проґрамі, є то, же вшыткы малокласны школы на языково змішаных теріторіях вы мали быти выняты із обовязковых квот. В практіці то значіть, же покля нова влада буде продовжовати в думці, же треба рушыти малокласны школы, бо суть фінанчно неефектівны, народностны школы, котры суть многораз малокласны (русиньскы суть такы обидві), не будуть зрушены.

На фотоґрафії: Уряд влады Словацькой републікы. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫК