Прогулька в хмарах, понад Креницьом

На вершку Драбяківкы (894 м н.р.м) в Креници будувана єст видокова вежа, яка мат быти высока на 49,5 м. Вела до ней буде деревяна стежка в коронах дерев. Будова того особливого обєкту тырват од червця/юнія 2017 р. Отвертя плянуване єст на вересен/септембер 2018 р.

В вельох державах Европы находят ся уж стежкы в коронах дерев, але тота, котра будувана єст в Креници, буде в цілости з дерева, в примірі інчых – конструкциі сут метальовы, а лем покрываны деревом. Креницка стежка роблена єст з дерева акацийовой робініі, котра через долгы рокы тримат свій выгляд. Проходячы ся стежком, та з самой видоковой вежы, буде мож обзерати панорамы Яриницкой Яворины і Сандецкого Бескіду.

Креницка інвестиция ставляна єст на вершку лыжной стациі Солотвины Арена серед лісів Креницкой Яворины. Долгіст стежкы то 1030 м. В означеных пунктах стежкы буде мож почытати про природу, історию реґіону і його богату культуру. Траса буде доступна для вшыткых, в тым для старшых осіб і тых, котры переміщают ся на візках. Для одважных зрыхтуваны будут і специяльны фраґменты з рухомых бель на узкій лавці, мало того – буде мож і схоснувати 60-метрову зізджальню. Конструкцию мат підперати 18 веж і 87 столпів. Обєкт доступний буде цілий рік.

Креницка інвестиция фінансувана єст м.ін. середками з Реґіонального Операцийного Проґраму Малопольского Воєвідства на рокы 2014-2020, якій переказал на тоту ціль 3,5 млн зл.

Стежка в Креници буде першом в Польщы. Будуваны сут видоковы вежы в Ґорцах (на Лапсовій Поляні, Долгій Поляні та Задзялі), а два рокы тому вознесено іх на верхах Маґуркы, Любаня і Козяжа. Подібний обєкт быти може вознесений буде і на Буторовым Верху в Костелиску, одкале розтігат ся єдна з найкрасшых панорам на Татры.

Минулого рока стежку в коронах дерев отворено на Словациі в Высокых Татрах в місцевости Здзяр. Притігат она тисячы туристів. Вознесено ю на границі двох нацийональных парків – Пєніньского і Татряньского, на вершку Спишской Маґуры на высокости 1160 м н.р.м. Едукацийна стежка в хмарах має 600 м долгости і дозвалят обсервувати природу з высокости 24 м над земльом. На єй кінци находит ся видокова вежа высокости 32 м.

Фот. wiezawidokowa.pl