Промітаня філму Воскресеніє народа і бісіда з його продуцентков

Кінцьом юла 2019-го року одбыла ся в пряшівсім Театрі Александра Духновіча премєра нового документарного філму Воскресеніє народа. То вже третій документ продуцентьской двоїці Джон Ріґетті і Марія Сілвестрі, котрого выробу підпорила Фундація Джона і Гелены Тімовых (John & Helen Timo Fondation). 

Філм є од зачатку септембра досупный і в сервісі Youtube, но в місяці октобер суть напланованы три публічны промітаня, по котрых буде мож бісідовати з продуцентков Марійов Сілвестрі, яка до Европы прийде із Споєных штатів Америкы. Філм буде мож видіти в Братіславі, Пряшові і Ґорлицях.

Воскресеніє народа захоплює через своїх розповідачів – Олену Дуць Файфер, Анну Кузмякову, Теодозію Латтову, Кветославу Копорову, Франтішка Крайняка, Павла Роберта Маґочія, Маріяна Марка, Анну Плішкову, Діна Полоку, Тібора Мікловша Поповіча, Джона Ріґеттія, Петра Трохановского і Еву Міхну вшыткы важны моменты історії, котра офіціално зачала перед тридцятьома роками, історії русиньского возроджіня.

Філм говорить о першых кроках русиньского руху на фоні розпаду комуністічной імперії, о першім конґресі, котрый проходив у Меджілабірцях, о першых успіхах, котры Русины зачали досяговати, што было лем потвержіньом того, же народ не счезнув.

Воскресеніє народа є окрім розповіданя респондентів обогаченый о цінны архівны знимкы, філмовы матеріалы із Словацького філмового іншітуту, як і о знимкы з дрону.

Промітаня з бісідова одбудуть ся 21-го октобра в Клубі Лучніця (Klub Lúčnica) в Братіславі о 18.00 год., 25-го октобра в Театрі Віола (Divadlo Viola) в Пряшові о 18.00 год. і 26-го октобра в Руській Бурсі в Ґорлицях о 15.00 год. Вступ на промітаня є в каждім місті безплатный. О філмі веце можете дочітати ся ту.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА