Проєкция фільму на фінальній стрічы «Музыкы без границ»

Стріча завершаюча проєкт «Музыка без границ» получена з проєкцийом фільму і святочным концертом в рамках «Святкувань Русинів під градом» пройде в найблизший понеділок, 18. грудня/децембра 2017 р., о 18.00 год. в кіні Татра в Старій Любовни.

«Музыка без границ» то проєкт, орґанізатором котрого є фундация Добра Воля, а автором та координатором з польской страны являт ся др Юстина Чонстка-Клапита, етномузыколожка і антроположка культуры. Проєкт фінансуваний є з середків Міністерства Культуры і Нацийональной Спадковины. Партнером та орґанізатором по словацкій страні є Любовняньскій Освітовий Осередок, директором якого є Мартін Караш, председа Русиньской Оброды на Словациі та ведучий ансамблю Барвінок з Камюнкы. Як раз камюньскій колектив был єдном з ґруп, што брали участ в проєкті мапуваня і нагрываня русиньской народной музыкы.

Проєкт «Музыка без границ» зачал ся ярю 2017 р. В рамках першого етапу проходили тереновы выізды, вчас котрых дослідникы провели чысленны бесіды з русиньскыма жытелями Литмановой, Камюнкы і Великого Липника. Фінал проєкту прошол 27. серпня/авґуста 2017 р. на тарасі гірской хыжы на Паленици в Щавници. Была то остатня плянувана в рамках «Музыкы без границ» інтеґрацийна стріча. Цілю проєкту было удокументувати музычну культуру Русинів зо Спиша, польско-словацкого погранича. В заложынях проєкту было найти музычно-культуровы реляциі медже Русинами, якы жыли зо собом в найблизшым сусідстві, а попри тым были розділены границьом.

Награний материял є реляцийом зо вшыткых акций проведеных в рамках проєкту – серед них находят ся тереновы інтервю переведены на яр 2017 р. та першы інтеґрацийны і досліджыньовы стрічы з мая і червця 2017 р. Фільм представлят тіж реляцию з двох подій, што проходили літом 2017 р., до котрых враховує ся 70-літя акциі Вісла та «Закінчыня літа» на Паленици, якє получене было з презентацийом зобраных до того часу результатів проєкту. Во фільмі находит ся і реляция з варштатів фольклору, котры одбыли ся в трьох школах на обшыри Пєнін, та студийных награнь, дякы котрым выдана буде платня з музычным материялом спільным для обнятых проєктом реґіонів.

В «Музыці без границ», окрем уж вычысленых осіб, брали участ тіж такы ансамблі як Вородай з Великого Липника, Майдан з Литмановой та Капеля Яська Кубіка з Коростенка над Дунайцьом. Участниками проєкту были і пєніньскы ґуралі – Анджей Дзєдзіна-Вівер, Яніна Ґавлік зо Щавниці, выселений з Явірок Русин Василь Гнадкович та Аґнєшка Стопка з Чорной Воды. Фільм документує музычны інтеґрацийны стрічы, артистичны выступы та інтервю з участниками проєкту і з вельома інчыма репрезентантами ґуральской та русиньской культур в Польщы і Словациі.

Фільм є істо зворушаючий, вшыткы будеме при ним плакати – бесідує др Юстина Чонстка-Клапита, котра протягом парох остатніх тыжнів разом з режысером Кжыштофом Кжыжановскым занимала ся обробком зобраного материялу.

Стріча, што получена буде з передсвяточным концертом, буде збогачена о культурний проґрам русиньскых колективів і солистів. Выступлят м.ін. Анна Сервіцка, Анна Порачова, Мариянна Железна, Кечера, Барвінок, Вородай та другы ансамблі.

Партнерамы проєкту сут Містецкій Осередок Культуры в Щавници, Карпатска Наукова Рада, Бар Ґронь і Пенсийонат Три Короны в Щавници.