Пряшівскый край влони господарив з рекордным розрахунком

З історічно рекордным розрахунком влони господарив Пряшівскый самосправный край (ПСК). Приймы досягли суму 277,4 міліона а вытраты были 303,2 міліона евр. Но по зрахованю вшыткых фінанчых операцій край за рік 2022 зазначів пребыток майже 20,9 міліона евр.

Выходить то із завершального рахунку ПСК за минувшый рік, котрый посланці Заступительства Пряшівского самосправного краю схвалили на своїм засіданю в понедільок 17-го апріля 2023-го року.

Посланці по одрахованю невыхоснованой фінанчной дотації з Міністерства фінанцій Словацькой републікы і пожычок в сумі 833 тісяч евр розділили решту фінанчных средств в сумі понад 20,8 міліона до двох фондів. 18,1 міліона ішло до резервного фонду і 1,9 міліона до фонду невычерьпаных дотацій.

„Завершальный рахунок быв схваленый. Сума вытрат на уровни 302 міліонів евр є рекорд в історії Высшого теріторіалного цілку,“ повів ведучій одділіня фінанцій Уряду ПСК Петер Макара.

Дотеперь рекордный розрахунок мав край у 2021-ім році. Влони ся звекшыв о майже 15 міліонів евр в приймовій части і 35 міліонів у части вытрат. За словами Макары то вдяка тому, же Словакії ся господарьскы добрі вело і досяг COVID-19 не быв такый, як економове проґнозовали.

Ґаздованя краю у 2022-ім році, як ся пише в документації ку рахунку, позначіла пандемія, война на Україні і енерґетічна кріза. Но і наперек складному періоду економіка Словацькой републікы росла.

„І вдяка прязному вывою економікы державы а прязному выберу дани фізічных особ были приймы мірно высшы як проґнозы, з котрых выходив розрахунок ПСК,“ пише ся у схваленім матеріалі. Часть розрахунку на вытраты была веце затяжена з причіны превенції односно шыріня вірусу, помочі біженцям з Україны і высокых цін ґазу а електрикы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА