ПСК крок ближе ку інфраштруктурі про водоводы і каналізацію в окресі Снина

Хоць в окресі Снина є великый водный резервоар Старина, вдяка котрому скінчіло під водов сім русиньскых сел, і котрый додавать воду на питя про велику часть выходной Словакії, села в тім самім окресі не мають доднесь інфраштруктуру про водоводы і каналізацію.

Сітуація бы ся в будучности мала змінити. Депутаты Пряшівского самосправного краю (ПСК) на своїм засіданю 7-го фебруара 2022-го року занимали ся і жадостьов о фінанчну дотацію, без потребы навернутя, у вызві Інтеґрованого реґіоналного операчного проґраму про забезпечіня основной інфраштруктуры пор села в Сниньскім окресі.

Єдночасно, як інформовала Леа Геілова, з одділіня комунікації і пропаґації Канцеларії председы ПСК, схвалили депутаты 5-процентне співфінанцованя проєкту, котре має быти в сумі 78 тісяч евр.

Забезпечіня воды ближе ку реалізації

Забезпечіня воды на питя і каналізації про 28 сел в окресі Снина є подля Уряду ПСК крок ближе ку реалізації. Депутаты на фебруаровім засіданю схвалили поданя жадости о дотацію на предпроєктову приправу, потрібну на забезпечіня основной енвіроменталной інфраштруктуры в тім окресі.

„Вклад Пряшівского самосрпавного краю є головно в тім, же селам додаме проєктову документацію, кедьже самы не мають фінанчны, ани персоналны капаціты на то, жебы собі єй самы забезпечіли. На основі той проєктовой документації будуть давати жадости о фінанцованя выбудованя водоводів і каналізацій в 28 селах окресу Снина,“ повів председа ПСК Мілан Маєрьскый з тым, же то перша того тіпу актівность, яку край реалізує, і котра не мать аналоґію ани на Словакії, ани в сусідніх країнах.

Очекує ся, же на тот проєкт буде треба 1,56 міліона евр, з чого 5-процентне співфінанцованя, яке представлює 78 тісяч евр, заплатить край.

Робила ся вже сондаж

Як повів ведучій Одділіня проєктового ряджіня ПСК Ян Коцак, в окресі Снина вже вертіли, жебы зробити сондаж і выбрати так місця, котры бы были добры про додаваня воды на питя в рамках тых сел.

Того часу роблять оцінку зробленой сондажи, ці суть выбраны місця добры, ці уж з хемічного боку, мікробіолоґічного або з погляду того, кілько воды дане місце може давати.  Сондажи, котры не были зроблены добрі, будуть іщі подля шефа проєктового ряджіня Коцака повторяти.

Проєкт, на котрый ся жадають грошы, обсягує і вытраты на моніторінґ, проєктуво приправу, екстерьне забезпечіня службы маєтковоправного выспоряданя фундушів, як і далшы з будованьом водоводів і каналізацій повязаны урядны процесы.

Актівности Catching-up Regions

Цільом актівностей Пряшівского самосправного краю у співпраці із Світовов банков, Европсков комісійов і Міністерством інвестіцій, реґіоналного розвитку і інформатізації Словацькой републікы в рамках ініціатівы Catching-up Regions є забезпечіти 28 селам окресу Снина, котрым бракує основна енвіроментална інфраштруктура, оптімалны алтернатівны технічны рішіня розвитку, управльованя і дістрібуції жрідла воды на питя.

Так само їм хоче край забезпечіти збераня, чіщіня і ліквідацію одпадовых вод. Выслідком актівностей пряшівской жупы так буде зроблена проєктова документація про водоводы і каналізацію.

Водоводы і каналізації ся будуть робити на теріторії, на котрій находять штири долины Сниньского окресу: Пчолине і околіця, Убляньска долина, Улічска долина і Збойска долина.

Інфраштруктура про забезпечіня додаваня воды на питя, як і далшы службы, будуть доданы про 24 сел з веце як 5000 жытелями, а інфраштруктура і службы одпадовых вод про 28 сел з приблизно 7000 жытелями.

Пряшівскый самосправный край одгадує, же до кінця 2029-го року бы мали мати споминаны села ку діспозіції і водоводы, і каналізації.

Жрідло фотоґрафії: Pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА