Радийовы варштаты з дітми і для діти!

Уж неодолга, 1. жолтня/окторба тр. в будинку Руской Бурсы в Ґорлицях пройдут першы варштаты радийового кумшту для наймолодшых. Хочеме вказати, як «од кухні» выглядат наша штоденна робота і што сме готовы одкрывати новы таланты і давати можніст ставляти першы крокы в світі русиньскых медий наступным ґенерациям.

Школіня для адептів радийового фаху зачне ся о 13.00 год. професийным розгрітьом голосу і ґамбы, пак участникы дознают ся, як зробити гавкаючого джінґля, котрый пошырит нашу радийову базу і котрого будут мочы слухати вшыткы, што лем залучат ЛЕМ.фм.

А кєд найдут ся охочы молоды акторы, та вєдно з редакторами нашого радия награме радийове слуховиско на основі єдного (або веце, о кілько буде сила і охота!) тексту з публикациі «Оповім Ти байку…», част 2, Косит Комар печатаной з сериі «Байкы Русинів і інчых народів».

По школіню просиме на малый почастунок. Не маме віковых ограничынь. На місци будеме мати диктафоны, мікрофоны, міксеры, каблі… та цілу решту необхідного ґратя. Варштаты сут дармовы.

Родичів просиме присылати зголошыня до участи діти в варштатах на майльовый адрес radio@lem.fm.