«Реанімували» старый бобслейовый тор для членів Креницкого Гокейового Товариства. Рахуют на новый обєкт за 100 млн зл

Ци Крениця буде мала бобслейовый тор, што сполнят вымаганя звязаны з орґанізацийом медженародных змагань та чемпіонату світа? Рішыня іщы неє. На тоту хвилю найважнійше є, жебы молоды санкарі мали де практикувати. По части повело ся одремонтувати історичный обєкт на Парковій Горі, спортовці можут зачати тренувати іщы в тым сезоні.

Популярный на цілу Европу бобслейовый тор в Креници оддали до хоснуваня в 1929 році, о рік скорше было основане Креницкє Гокейове Товариство, завдякы котрому реченый обєкт вознесли в місточку.

Першый Чемпіонат Польщы прошол гын в лютым/фебруарі 1930 рока. Креничане ревеляцийні выстартували. Пару років пізнійше одбыл ся гын Чемпіонат Европы, а в 1958 році Чемпіонат Світа. Черговый Чемпіонат Світа зорґанізували в Креници в 1962 році. Тор пережыл вельо престіжных подій, але з часом попал в руіну.

Ждаючы на новый, забрали ся за ремонт старого

Історичный уж тор на Парковій Горі парукратні ремонтували. Іщы в 1979 році зорґанізували гын Чемпіонат Европы Юньорів, на котрым участникы з Польщы здобыли золотый і бранзовый медалі. В 80. роках ХХ столітя зачали тор розберати.

Креницкы діячы не перестали бороти ся, жебы побудувати новый тор з олимпійскыма параметрами. Вшыткы сут згідны, што то як раз Крениця є вітчызном бобслейового спорту в Польщы і як раз гын повинен найти ся професийный тор. Тото, ци обєкт за близко 100 млн зл побудуют на Горі Івонк,а іщы не рішыли.

З той причыны Креницкє Гокейове Товариство, в котрым реактивували бобслейову секцию, рішыло зробити ремонт старого тору.

Роботы зачали од позбераня смітя. Пак вымінили перегнилы дошкы, одбудували віражы і зрыхтували обєкт до сезону. Кєд буде мороз, тор мож зрыхтувати під слизґаня. Хоснувати будут го діти і молодіж.

«То лем акцийна ініциятива, котра має не лем дато можливіст молодежы тренувати на торі, але і припомнути жытелям Крениці, курортникам і туристам про обєкт, котрый в найліпшым його часі был єдным з найбарже популярных і любленых спортовцями на світі» – коментує бывша санкарка, соспільна діячка з Крениці Барбара Жешут.

З Парковой Горы на Гору Івонка

На Парковій Горі находит ся част старого тору долгости 500 м, на котрый дают лед старыма методами – необхідны сут мінусовы температуры вчас робіт і міцне падіня снігу. Каждого рока в періоді од січня/януара до кінця лютого/фебруара єст хоснуваный молодыма адептами санкарства, проходят гын змаганя Загальнопольскых Олимпіяд Молодежы в Зимовых Спортах, Чемпіонат Польщы, а тіж Медженародны Змаганя о Погар Крениці.

Бургомайстер Пьотр Рыба заповіл, же в роках 2023-2024 на убочы Горы Івонка в Креници має рушыти будова першого в Польщы бобслейового тору. Кошт інвестициі мал бы быти більшый як 100 млн зл. Векшіст середків на будову мало бы походити в Міністерства Культуры, Нацийональной Спадковины і Спорту.

По вересньовій/септембровій стрічы в Душниках ресорт поінформувал, што тор вознесут як раз гын. В публичным просторі явили ся інформациі, што є то конец мрий о будові того тору в Креници…

Ци буде?

Сам бургомайстер Рыба зазначыл, што не бере медияльных донесінь як певны. Додал, што самоуряд Крениця зробил барз вельо в тій справі, од років рыхтує ся до інвестициі і єст ліпше зрыхтуваный як Душникы. Патрик Віхер, посол на Сойм, якій од початку старат ся, жебы побудувати тор в Креници зазначат, што рішыня іщы неє і што іщы вшытко може ся трафити. Будова тору была бы для Крениці шансом, жебы курорт зас стал ся медженародні славный.

Фот. Нацийональный Цифровый Архів