Рихтує ся друкована Інтерфийса. Унікатный проєкт

23-го януара 2024-го року минуть точно три рокы, одколи до русиньского світа інтернету вступив вебсайт Інтерфийса. Стоять за ним двоми молоды русиньскы ентузіасты з Підкарпатя – Мигаль Лыжечко і Петро Біров. З той нагоды рихтує ся друковный зборник із єднаков назвов.

Проєкт Інтерфийса – то некомерційный портал, „цільом котрого є шырити новости і назоры, старати ся школовати людей у технолоґіях, хоснуючі нашу бісіду,“ дочітаме ся на порталі. Інтерфийсу Лыжечко з Біровом основали якраз на 10-ту річніцю выникнутя русиньской языковой верзії сайту Wikipedia.

Од свого выникнутя портал Інтерфийса приносить статі з области технолоґічных новостей, популарной наукы, і є унікатным русиньскым проєктом што до той проблематікы.

І вдяка роботі двох запаленых Русинів із Підкарпатя мож знова раз пересвідчіти ся, же в русиньскім языку мож писати о вшыткім, чітати о вшыткім, а є лем на нас, жебы тот язык далше розвивали сьме у вшыткых областях.

В тых днях редакторы оголосили, же з нагоды третьой річніці основаня сайту рихтують про своїх чітателів парадне святочне друковане выданя, в котрім будуть найліпшы статі, якы были на порталі публікованы. А нелем то. В друкованім выданю чітателі найдуть і ексклузівны матеріалы, котры іщі на вебсайті не были.

Як інформовав основатель і редактор порталу Інтерфийса Мигаль Лыжечко, котрый є окрім іншого і познатый русиньскый ютюбер із псевдонімом Мигаль Кушницькый, вытрати на друкованя єдной книжкы будуть коло 7 евр. Половину грошей русиньскы актівісты хотять дати на дакотру фундацію, котра підпорить вояків, якы днесь мусять боронити країну атаковану аґресором.

Но жебы мож было дати зборник до друку, Інтерфийса потребує знати, кілько людей бы мало серьйозный інтерес о тоту публікацію.

Кедьже і наша редакція підтримує тоту актівность нашых підкарпатьскых Русинів, котры не мають жадной фінанчной підпоры, а роблять то лем позад свого ентузіазму і пересвідчіня, звертаме вашу увагу на можливость записати ся меджі тых, котры бы дану публікацію хотіли мати.

Свій інтерес о друковане выданя Інтерфийсы, можете зголосити выповніньом куртого формулара, в котрім зохабите свій контакт, і вдяка котрому вас выдавателі годны будуть контактовати. Формулар найдете за тым мотузком.

Покля сьте дотеперь портал Інтерфийса не знали, унікатны технолоґічны статі писаны по русиньскы можете прочітати за тым мотузком.