Родинний Табір 2016 – уж мож плянувати

Хоц до літа іщы дост далеко, то певно дeкотрых родичів втішыт інформация, же і того рока буде проходил Родинний Табір в Завадці Рыманівскій. Мож зато сміло заплянувати і вписати в родинний календар спільний урльоп. Чом так?

Родинний Табір то тыжньова подія, яку орґанізує Стоваришыня Карпатка і є то оферта творчого выпочынку для цілой родины. Тогорічна едиция буде проходила в днях 3.-9. липця/юлия. Детальний проґрам явит ся дакус пізнійше, але уж тепер знаме рамовий плян Табору, а тот буде по части навязувал до мадярскых традиций – буде наука угорскых танців для великых і малых, а для тых, котрым не тяжко єст кус долше ся сконцентрувати, заплянувана єст прелекция, котру выголосит Бартек Ґалонзка – о влияню мадярской музыкы на пісні пілнічного боку Карпат.

Для найменьшых предвиджены сут занятя до полудня, а то музычны, танцувальны і плястичны варштаты, інспіруваны корінном традицийом. Для кус більшых – ремісничы занятя, т.є. варштаты вырабляня глиняных горнців, сопілок і свисталок, традицийных народных чачок, буде мож вчыти ся ткати полотна, а тіж зробити сой дашто з дерева (столярскы варштаты).

Музыка і танец будут товаришыти вшыткым участникам цілий час. Не дост, же будут ведены варштаты танця (традицийных угорскых і польскых танців) і співанок (мадряскых і карпатскых мельодий), то буде мож одраз провірити приспособлене знаня гуланя і співаня на вечерніх забавах. Пригрывала буде м.ін. Капеля Малішів, яка уж давно перестала быти граючым лем на фестинах родинным ансамбликом, а єст знаным во світі ансамбльом, якій презентує корінну польску музыку, а прикрашают го феноменальний молодий гушляр, особливий женьскій, хоц по правді іщы дівочий, вокаль і своєрідний вид капелі як цілости.

На Табір запрошена єст ґрупа Мадярска Амбасада Народной Музыкы (Magyar Népzenei Nagykövetséget). То дост свіжий ансамбль (оснований в 2013 році) молодых музыків, якы хотят вказувати і промувати всяди, де ся лем даст, народну музыку і культуру жытелів Мадяр. На яр того рока хотят выдати альбом пн. Báthory – Bem – Balatonboglár, якій посвячений буде історичным односинам і польско-мадярскым реляциям.

То лем част богатой проґрамовой пропозициі табору. До выміненых доходят іщы зілярскы, еколоґічны прогулькы, звиджаня лемківской хыжы в Завадці, дві прелецкиі о архітектурі і інчы. Будут тіж стрічы з музыкантами, а для діти – чытаня байок.

В попередніх едициях участникы табору могли вчыти ся лемківскых танців і співанок, были доповіди о лемківскых традициях і звыках. Знимкы з влонишнього табору обзерати можете гев.

Дрібниці і контакт до орґанізатора найдете на офіцийным сайті Родинного Табору в Завадці Рыманівскій. ЛЕМ.фм, як і по інчы рокы, тримат медияльний патронат над подійом.