Роман Гавраняк: Я переграл своє жытя на саксофоні… – (перша част) – 70 процент – субота, 20.00 год.

Осін – весільна пора, зато днеска звучыт бесіда з весільным гудаком. Роман Гавраняк походит з родины гудаків з Посады Яслиской, села при Яслисках.

Родина Гавраняків – Фецьо, його жена Лисаветка, дволітна Ірка і двомісячный Ромко – выіхала з Посады Яслиской 6. січня/януара 1945 рока. Святий Вечер мусіли святкувати уж в дорозі… Роман захворіл як раз товды, коли Лемків з того села мали выселяти на схід. Так захворіл, же його отец пред том дорогом зробил для дітины маленьку труну.

Труна, щестьом, никому ся не придала, а з малой дітины выріс хлопец, здібний до вшыткого, і до музыкы, розуміє ся, тіж. І тота же музыка ратувала Гавраняків в тяжкы і голодны рокы. «З татом і зо сестром Ірином одограли сме 64 весіля, а пак сестра ся оддала і уж рідко грала з нами» – оповідат наш гіст. Пак він сам уж зобрал ґрупу гудаків і продолжыл родинну традицию…