«Русины» в ґалериі Дому Нацийональных Меншын в Празі

Іщы лем тыжден, до 12. мая тр., мож обзерати фотоґрафічну выставу Іваны Яшміньской пн. «Русины» в ґалериі Дому Нацийональных Меншын в Празі.

«Перед трьома роками моі стежкы завели ня до місця мого дітинства, на східню Словацию, де люде фурт жыют в згоді і близко натуры та Бога. Од того часу реґулярні гын вертам» – коментує своі знимкы авторка.

Івана Яшміньска (вр. 1980 р.) то родачка з Гуменного, наштоден жыє і творит в Празі. Єст абсольвентком Університету Яна А. Коменьского в Празі (студиювала на напрямі специяльна педаґоґіка) та Шлезского Університету в Опаві, на котрым студиювала фотоґрафію в Творчым Інституті.

В 2011 р. остала лавреатком першой нагороды The Annual Photography Awards, престіжового фотоґрафічного конкурсу о світовым засягу, за роботы вказаны в катеґориі Емоциі, отримала так само Grand Prix Award. В 2014 р. признали Яшміньскій перше місце в рамках CheckCzech Photo Competition.

В остатніх роках своі фотоґрафіі вказувала на выставах в Празі, Братиславі, Миляні, Блатній ци Теплицях.

Єст авторком циклю знимок «Русины», будучого пробом затримати на фотоґрафіях образ русиньского населіня. Фотоґрафіі вказуют люди, якы сут розділены з родином, самітны, бесідуючы або молчачы, якы тяжко роблят каждого дня або прібуют лем дожыти до наступного сходу сонця. Яшміньска так само документує і Нацийональный Парк Полонины.

«За каждым разом коли вертам, стаю ся барже свідома того одкале єм і кым єм» – коментує фотоґрафка.

«Каждый з нас має своє духове місце, котре веде го од дітинства. Його образы проникают до нашых споминів в ріжных інтервалах часу і з ріжном інтенсивністю. Отверают тунелі до нашого внутри, котрыма вертаме, котрыма блудиме, а при тым фурт одкрываме новы значыня і символы. Змушат нас тото думати о річах, о котрых сме уж забыли, з котрых сме выросли, але чым дале, тым веце здаєме сой справу з того, што то інтеґральна нас част» – додає Яшміньска.