Русиньска ватра в Малім Липнику буде уж 15-ый раз

Фолклорный фестівал Русиньска ватра одкрыє свої браны про шыроку публіку юбілейный пятнадцятый раз. Навщівници фестівалу можуть зажыти русиньску културу на властній скорі в мальованім оточіню пригранічного села Малый Липник коло рікы Попрад.

15-ый рочник фестівалу принесе інтересный супроводный проґрам, котрый збогатить головны проґрамовы блокы.

Фестівал Русиньска ватра одбуде ся вже традічно почас другого юлового вікенду, в днях 10-го аж 12-го юла 2026-го року. „Каждый рік рихтуєме подію, котра надвязує на попередні рочникы, но все приносиме новоты і выліпшіня нелем проґраму, але і ареалу,“ приближыв директор Фолклорно фестівалу Русиньска ватра Петро Штефаняк.

Фестівал одкрыють дітьскы фолклорны колектівы, котры на головній сцені представлять ся в проґрамі Дітьскый світ о 18.00 год. Із фоклорныма пасмами выступить: ДФК Радость із Камюнкы, ДФК Маковічка із Свідника, дітьскы співаци-солісты.

Пак буде наслідовати концерт під назвов Співы мого роду, в котрім заспівають лавреаты або участници послідніх рочників того конкурзу під покровительством Русиньской оброды на Словеньску. Русиньскы співанкы зазвучать в інтерпретації Сімоны Кашпер і Браніслава Лайчака, родинного Трія Маґуровых і Tрія Кечера із Якубян. Выступаючіх буде допроводити Музика Мілана Рендоша.

Пятніцьовый проґрам буде кулміновати о 20.20 год. концертом Вечур русиньскых голосів, в котрім представлять ся інтерпреты трьох жанрів співанкы – СҐ Столичного джывкы із Великого Липника, Музика Мілана Рендоша і фолкрапова ґрупа Calibri Gang. Пятніцьовый проґрам закончіть забава з капелов Колачковске тріо.

„Суботняйшый проґрам на головній сцені має уж стабілну штруктуру і поступно представить колектівы із реґіону, близкых окресів, але і ціловечерный проґрам,“ повів Петро Штефаняк.

Із початком о 16.30 год. в проґрамі Мозаіка реґіону з тематіков русиньско-ґуральского сполужытя в реґіоні представлять ся фолклорны колектівы і солісты з околоці Старой Любовні: ФК Бардійов, ФК Старолюбовнян, ФҐ Ґорал із Ждіару, Ґоролі із Лендаку, ФҐ Остурнянка, Александра і Мірослав Бек, ФҐ із Малого Липника.

О 18.30 год. фестівал привітать гостів із Спіша в проґрамі Вітайте, сусіды, з підназвов „Valachi seu Rutheni“. Выступати будуть: ФК Чачіна із Спішсковй Новой Всі, ФҐ Порачан, ФҐ Завадчан, Мірослав і Александра Бек, Марек Резніцькый, Петер Ковач.

Послідній проґрамовый блок традічно належыть ціловечерному проґраму єдного колектіву з різнов тематіков. В проґрамі В крузі жывота нам ФК Борієвка із Кошыць в супроводі Народной музикы Матєя Топольовского одпрезентує погляд на світ жены од колыскы. Завершіньом фестівалу буде вже традічно паліня ватры за участи ФҐ Ґорал із Ждіару а фолклорных колектівів. Паліня ватры плынуло перейде до народной забавы в супроводі Народной музикы Матєя Топольовского.

На своє собі прийдуть на фестівалі і діти. Орґанізаторы про них почас цілого фестівалу приготовили актівности, атракції, презентацію проєкту Співана прогулька і творчі варштаты. Родічі так будуть годны повноцінно пережыти проґрам, покля о діти постараме ся.

В пятніцю і суботу про навщівників приготовленый є богатый супроводный проґрам:

• Ґастрофестівал – „Із реґіоналной кухні“ в пятніцю од 17.00 год. і в суботу од 15.00 год.
• Танечный лектор Штефан Ганзелій в суботу почас школы танця навчіть людей танці із русиньского села Штельбах.
• Почас цілого фестівалу буде проходити выстава фотоґрафій Катарины Щіґуліньской під назов Коріня і горізонты.
• В пятніцю будуть проходити творчі варштаты модротлачі і народной вышывкы.
• В суботу буде проходити творчій варштат сітьодруку із Марошом Обшіваном.

Фестівал в неділю закончіть дополідне Божественна літурґія в церьковнославяньскім языку в містнім Храмі свв. Козмы і Даміяна. Із концетром духовной пісні представить ся МСҐ Шамбрінці із Шамброна.

Далшов новотов є Путовне кіно в ареалі події, котре в четверь 9-го юна о 20.00 год. наштартує вікендову подію. Презентованый буде філм Потопа за участи його продуцентів.

Контакты про медії:

Інж. Петро Штефаняк, ПгД.
директор ФФ Русиньска ватра
тел.: +421 903 533 101

Подія была підпорена із фінанчных средств:

• Пряшівскогого самосправного краю
• Фонду на підпору културы народностных меншын
• SLOVAKIA TRAVEL
• TIPOS і Міністерства турістічного руху і шпорту

Веце інформацій і комплетный проґрам фестівалу Русиньска ватра найдете на соціалных сітях головного орґанізатора, обчаньского здружіня молоды.Русины, або на сайті фестівалу.