Русиньске націоналне свято в Еделейні

Вседержавне русиньске самосправованя орґанізує в суботу 28-го мая 2022-го року Русиньске націоналне свято в Еделейні, недалеко Мішколця. Подія буде проходити в Авлі Ґрекокатолицькой школы святого Николая.

На русиньскім святі будуть участны і цінны гості, єпарха Мішколцьской ґрекокатолицькой єпархії владыка Атаназ Орос і Золтан Деметер, котрый є депутатом мадярьского парлемнту. Депутат над подійов перевязв покровительство.

В рамках події буде удільовати ся і Премія Антонія Годинкы, яку буде вручати председа Вседержавного русиньского самосправованя Віктор Крамаренко. Русины помолять ся і Паракліс, одправляти го буде владыка Атаназ.

В рамках кулурного проґраму будуть выступати Анна і Марія Бан, домашній Ансамбель народных танців Часта, як і Молодежный фолклорный ансамбель Русины.

Припоминаме, же в Мадярьску буде списованя жытелів аж тот рік, кедже было перенесене з причіны пандемії. І тота подія має укріпити русиньску комуніту, жебы записати собі в списованю жытелів свою народность і материньскый язык.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА