Русиньскы реґіоны одпрезентують ся в Кошыцях

Як інформовав Мартін Караш, председа Русиньской оброды на Словеньску, орґанізація приготовила серію културно-общественных подій з назвов Русиньскы реґіоны в місті.

Найближе з русиньсков културов з реґіонів можете стрітити ся в Кошыцях в неділю 29-го мая 2022-го року в просторах центра Южан.

Ідейов новой серії подій є, жебы в містах выходной Словакії презентовали ся русиньскы умелці і колектівы з реґіонів северовыходной Словакії, котры суть населены Русинами. В недільнім проґрамі, котрый буде за словами орґанізатора повный русиньского слова, музикы і танця, одпрезентують ся Барвінок із Камюнкы, Любовнян із Старой Любовні, Вородай з Великого Липника і Майдан з Літмановой.

Тішыти ся можете і на солістів – співаків і декламаторів з окресу Стара Любовня. Модеровати подія буде Наталія Гребікова, редакторка русиньской редакції Народностно-етнічного высыланя Радія і телевізії Словакії в Кошыцях.

„В окресі Стара Любовня є велика часть сел з населіньом по русиньскы бісідуючім, котре доднесь сохранять собі язык, церьковны і світьскы звычаї а традіції своїх предків. Жытелі тых сел суть векшынов віруючі восточного – візантійского обряду. І тоты атрібуты русиньской културы на Словакії будуть презентованы на події Русиньскы реґіоны в місті,“ додавать Мартін Караш, котрый за орґанізаторів сердечно запрошать на акцію до Кошыць.

Жрідло фотоґрафії: Піотр Басалыґа

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА