В другій половині януара 2021-го року выйде на світло світа проєкт під назвов Русиньскы вышывкы з омальованков. З проєктом приходить Rusynshop i припаять ся тым ку актівностям повязаным з выголошеным Роком русиньского села.
В єднім комплеті мож дістати 32-сторінкову брожуру з короткым выкладом ку вышывці, окрему єднако 32-сторінкову омальованку і єден комплет з 12-ма фаребныма церузами. Тым вышывкы стануть інтересныма про цілу родину.
Од половины децембра є спущена кампань, в рамках котрой собі можете вышывкы з омальованков передобїднати. Rusynshop так приносить і новый формат продая, подобный такому, як є вебсторінка StartLab (словацькый сайт про fundraising), де собі заінтересованы передплатять товар скоріше як іде до выробы.
Ідейов проєкту є передовшыткым приближыти красу народной традіції, котра переносила ся і до културы обліканя. Вышывкы одрізняли ся нелем меджі селами, але і в рамках них. Своїм способом была кажда унікатом. Дідовизну нашых старых матерей такым способом гравов формов можеме презентовати дітям. Окрім выфарбліня мотіву можуть здокональовати ся і в русиньскім языку при переписованю назвы села.
Про веце інформацій можете навщівити вебсайт www.rusynshop.sk або ся контактовати з творцями того інтересного проєкту на імейловій адресі info@rusynshop.sk.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі