Русиньскый музей одкрывать выставку присвячену ІІ. світовій войні

Словацькый народный музей – Музей русиньской културы в Пряшові на днесь, 17-го януара 2017-го року, приготовив одкрытя выставкы, присвяченій Другій світовій войні. Выставльовати ся будуть фотоґрафії і автентічны артефакты.

Од Сталінґраду по Берлін має назву выставка, котру приготовив русиньскый музей. Вітязный поступ Червеной армії припомянуть фотоґрафії, части выстроя вояків і далшы автентічны артефакты. Музей тоту выставку приготовив вєдно із Словацько-російскым обществом, клубом Арбат в Пряшові і Общаньскым здружіньом Пряшівскый клуб воєньской історії Дукля.

„На добовых чорнобілых фоторепродукціях суть знимкы зроблены прямо з бойовых подій вояків в уліцях дакотрых міст, наприклад Сталінґраду, Ленінґраду, Севастополя, но і знимкы з освободжіня Братіславы, Відня, Прагы і Чехословакії,“ повіла про словацьку державну пресову аґентуру TASR директорка Словацького народного музею – Музею русиньской културы Ольґа Ґлосікова.

Выставка є доповнена автентічныма артефактами, облечіньом, обутьом і частями выстроя вояків Червеной армії, котры были запожычены Обчаньскым здружіньом Пряшівскый клуб воєньской історії Дукля.

„Навщівници собі так можути припомянути вшыткы жертвы на людьскых жывотах, котры собі выжадали тяжкы бої Другой світовой войны ведучі ку вітязству над фашізмом і новому жывоту в освободженій отцюзнині,“ повіла далше Ґлосікова.

Выставка має свою вернісаж днесь о 16.00 год. Датум быв выбратый на предвечур 72-ой річніці освободжіня міста Пряшів. Експозіцію присвячену Другій світовій войні буде в русиньскім музею мож видіти аж до 15-го мая 2017-го року.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА