Голосник

Русиньскый фестівал і фолклорный конкурз в гуменьскім сканзені

Фолклорный день приготовив Вігорлатьскый музей в Гуменнім в просторах свого сканзену на 5-го септембра 2020-го року. Суботнє пополідне буде належати аж двом подіям. Інформовала о тім Яна Федічова із Вігорлатьского музея.

Од 13.00 год. буде в Експозіції народной архітектуры і бываня проходити подія під назвов Грай, співай, танцюй… і по ній буде слідовати од 15.00 год. 6-ый річник Русиньского фолклорного фестівалу.

Грай, танцюй, співай…

Грай, танцюй, співай… є реґіоналным конкурзом музичного фолклору дорослых. Конкурз проходить в катеґоріях соло спів і дует.

Конкурзный репертоар участных в окремых катеґоріях буде выключно із фолклорного матеріалу области вышнього Земпліна, значіть з окресів Гуменне, Снина, Меджілабірці, припадно прилеглых областей реґіону в рамках Словакії.

Русиньскый фолклорный фестівал

Понад двасто фолклорістів з реґіону вышнього Земпліна авізує Вігорлатьскый музей почас першой септембровой суботы в рамках 6-го річника Русиньского фолклорного фестівалу. Розмаїтый музичный, співацькый і танечный проґрам зачне такой по реґіоналнім конкурзі.

„В дакількогодиновім проґрамі ся представлять запалены носителі і пропаґаторы културных традіцій реґіону, лавреаты многых фолклорных переглядок і конкурзів, членове містных фолклорных ґруп і солісты спомеджі дорослых і дітячіх інтерпретів.“

В рамках фестівалу участны будуть годны видіти ансамблі Вігорлат Снина, Хемлон Гуменне, Хемлонячік Гуменне, ґрупы Гачуре і Босорочкы, солістів Людовіта Джубака, Михала Сійку, Ванду Марінчакову, Янку Маґурову і много далшых.

Фолклорный проґрам в гуменьскім сканзені є вкладом Вігорлатського музею ку підпорным актівностям ку Дню европской културной дідовизны, котрый ся святкує 14-го септембра. Фестівал є орґанізованый вєдно із Русиньсков обродов на Словеньску.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі