Русины на стрічі з представителями Рады Европы

В рамках 4-ой моніторуючой навщівы Порадного выбору ку Рамковому договору на охрану народностных меншын в Словацькій републіці, котра проходить в днях 22. – 26. септембра 2014 р. ся завтра в Братіславі одбуде стріча выбору з членами Выбору про народностны меншыны і етнічны ґрупы за русиньску народностну меншыну.

Порадный выбор є моніторуючій орґан Рады Европы, котрый ціклічно оцінює імплементацію Рамкового договору на охрану народностных меншын. В Словацькій републіці быв остатній раз у 2009 році.

Выбор ся почас того тыждня стрічать з представителями вшыткых народностных меншын, котры жыють на Словеньску. В понедільок ся зышов в Пряшові з представителями україньской народностной меншыны.

Стріча Порадного выбору є неформалнов стрічов. За русиньску народностну меншыну бы мали быти участны сучасны членове Выбору про народностны меншыны і етнічны ґрупы Ян Липиньскый зо Здружіня інтеліґенції Русинів Словеньска і Мілан Мнягончак з Русиньской оброды на Словеньску.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА