Голосник

Руска Бурса орґанізує конкурс для молодшых і старшых школярів лемківского языка

Стоваришыня «Руска Бурса» в Ґорлицях просит до участи в плястичным і літературным конкурсі. До выграня барз атракцийны нагороды. Молодшы можут провірити своі плястичны здібности, а тоты дакус старшы – свій писательскій талант.

Плястичный конкурс для діти «Ілюстрация до выбраного твору Меляніі Собин»

Того рока проходит сотна річниця од народжыня лемківской поетесы Меляніі Собин. З той нагоды просиме охочы діти (до 9 рока жытя) намалювати образок (свобідном техніком), котрый буде інтерпретацийом выбраного верша М. Собин. Малюнкы просиме высылати до 30. листопада/новембра тр. на адрес Руской Бурсы в Ґорлицях (рішат дата почтовой печаткы). До выграня: iнтеліґентный зыґарок (smartwatch), гуляйнога та комплет LEGO.

Кєд епідемічна ситуация на тото дозволит, то оголошыня результатів вєдно з вернісажом прац і вручыньом нагорід пройде в грудни/децембрі в Рускій Бурсі.

Реґулямін найдете долов (або до стягніня гев).

Літературный конкурс «Скарб мойой бабы/ мого діда»

Для старшых учеників пропонуєме конкурс, в котрым можут выказати ся свойом креативністю в писаню. Задачом є написати твір на тему «Скарб мойой бабы/ мого діда», в котрым опишут тото, што є цінным для іх прародичів, чому не дадут пропасти, што хотят сохранити.

Творы оцінюваны будут в двох катеґориях: школярів в віку 10-12 років та 13-15 років. Найліпшы творы опубликуєме на нашым сайті. Окрем того в каждій з катеґорий до выграня сут предметовы нагороды: спортова опаска або iнтеліґентный зыґарок, безкабльовы слухавкы, флешка 128 ҐБ.

Реґулямін найдете ниже (або до стягніня гев).


Плястичный конкурс
: «Ілюстрация до выбраного твору
Меляніі Собин»

Орґанізатор конкурсу: Стоваришыня «Руска Бурса» в Ґорлицях

  1. Хто може взяти участ?

Діти до 9 рока жытя, якы вчат ся лемківского языка.

  1. Ціли конкурсу:
  • познати діти з поезийом Меляніі Собин,
  • мотивувати діти до розвиваня плястичных здібности,
  • розвивати дітячу креативніст і імаґінацию.
  1. Присыланы роботы мусят быти самодільні зробленыма творами, свобідна техніка (малюваны фарбами, кредками, вытинанка ітп.), розмір А4.
  2. Єден участник може зголосити макс. єдну роботу. Працу треба підписати: подати мено і назвиско, вік, школу, мено опікуна, наголовок верша Меляніі Собин, до котрого односит ся робота.
  3. Критериі оціны: ориґінальніст, згідніст з темом, естетика, композиция.
  4. Орґанізатор выбере три найліпшы роботы, за котры признаны будут нагороды:
    – I місце: інтеліґентный зыґарок
    – II місце: гуляйнога
    – IІІ місце: комплет LEGO
  1. Tермін высыланя робіт: 30. листопада/новембра 2020 р. (рішат дата почтовой печаткы). Адрес высылкы: Stowarzyszenie Ruska Bursa, ul. Sienkiewicza 28, 38-300 Gorlice.
  2. Зголошыня творів до конкурсу є рівнозначне з освідчыньом, што сут то авторскы творы, і з переданьом згоды на перетворюваня і публикуваня особовых даных автора, опікуна та присланых прац на сайті lem.fm при інформациі о результатах конкурсу.

 

Літературный конкурс: «Скарб мойой бабы/ мого діда»

Орґанізатор конкурсу: Стоваришыня «Руска Бурса» в Ґорлицях

  1. Хто може взяти участ?

Ученикы, якы вчат ся лемківского языка.

Конкурс поділеный є на дві катеґориі:
– І ґрупа: школяре в віку 10-12 років,
– IІ ґрупа: школяре в віку 13-15 років.

  1. Ціли конкурсу:
  • мотивувати діти розвивати знаня писати по лемківскы і розвивати літературны здібности,
  • розвивати вражливіст на красу писаного слова,
  • пропаґувати потребу познаваня істориі родины, свойой спадковины, традиций і обрядів ітп.
  • розвивати дітячу креативніст і імаґінацию.
  1. Каждый участник присылат єден твір (може то быти байка, оповіданя, сценка, верш, макс. на 3 стр. компутерового выдруку А4, фонт 12 пкт), котрый є інтерпретацийом темы конкурсу «Скарб мойой бабы/ мого діда».
  2. Твір треба підписати: подати мено і назвиско, вік, школу, мено опікуна. Мусит то быти самодільна робота, але дозвалят ся выконати учытельом языкову коректу.
  3. Творы, в форматі PDF, просиме присылати на майльовый адрес: sekretariat@ruskabursa.org в терміні до 30. листопада/новембра 2020 р.
  4. Орґанізатор выбере три найліпшы роботы, за котры признаны будут нагороды:

в катеґориі 10-12 років:
– I місце: iнтеліґентный зыґарок або спортова опаска
– II місце: безкабльовы слухавкы
– IІІ місце: флешка 128 ҐБ

в катеґориі 13-15 років:
– I місце: iнтеліґентный зыґарок або спортова опаска
– II місце: безкабльовы слухавкы
– IІІ місце: флешка 128 ҐБ

  1. Зголошыня творів до конкурсу є рівнозначне з освідчыньом, што сут то авторскы творы, і з переданьом згоды на перетворюваня і публикуваня особовых даных автора, опікуна та присланых прац на сайті lem.fm при інформациі о результатах конкурсу.

Oба конкурсы будут розвязаны найпізнійше до 15. грудня/децембра 2020 р. Інформация про результаты буде публикувана на сайті www.lem.fm. Одбераня нагорід буде добесідуване індивідуальні. Як епідемічна ситуация на тото дозволит, то вшыткы плястичны творы найдут ся на выставі презентуваній в Рускій Бурсі в Ґорлицях, котрій товаришыл буде мінівернісаж з вручаньом нагорід.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі