Руснак о Руснаку – документ о Ендим Варголи

Документаліста лемківского походжыня Богдан Дзіворскі зачал власні крутити фільм о Ендим Варголи в Быдґощы, до котрой приіхал з премєром найновшого документального фільму Плюс мінус, значыт вандрівкы мухы на Схід.

Богдан Дзіворскі заінтересувал ся Варгольом зо взгляду на спільны етнічны корені, бо, подібні як Варголь, мат русинькє походжыня. Ідея фільму, як бесідує документаліста, взяла ся з потребы вертаня до коренів.

Фільм о Варголи не мат быти наступным типовым біоґрафічным фільмом о артисті. Б. Дзіворскі хоче зосередити ся на вказаню того, в якій спосіб на світ смотріл Варголь. Буде вельо абстракцийных візий, міцно посадженых в характеристычній для Варголя стилістыці. Не буде то ани докиментальний, ани фабулярний фільм.

Режысер звиділ уж Быдґощ, жебы выбрати місця для конкретных сцен. Уродинову імпрезу хоче накрутити в Польскым Театрі. Фоном буде сценоґрафія штукы Дітройт. Істория Рукы. В сурреалістычным парти участ возмут напевно звізды, якыма Ворголь інспірувал ся найбарже, напр. Мерилін Монро ци драґ квін (drag queen). Част кадрів буде накручена в Любостроню вчас фестівальовых геппенінґів, а част на зломовиску авт при ул. Фабрычній. Пару сцен вміщеных буде в синаґозі в Фордоні (част міста Быдґощ), а на потребы фільму на пару днів останут забльокуваны Алеі Оссоліньскых в Быдґощы. Там нагриваний буде приізд лізмузины, яком Варголь приіхат на своє парти.

Богдан Дзіворскі (вр. 8. грудня 1942 в Креници) – выдатний документаліста, фотоґраф, режысер. Од 80. років выкладач Выділу Радия і Телевізиі Шлеского Університету в Катовицях, полнил тіж функцию декана того выділу. Вельо років звязананий был з Освітовом Кіностудийом (Wytwórnia Filmów Oświatowych), де накрутил вельо документальных фільмів. Єст автором близко 40 фільмів та выстав і фотоґрафічных альбомів. Його творчіст была вельократно нагороджена і выріжнена на найбарже значучых фільмовых фесітвалях.

Його найблизшы пляны, по скінчыню фільму о Варголи, то продукция документу о спілоснователю і ґітаристі The Rolling Stones – Кіті Річардсі.

(фот. Лукаш Шельонґ culture.pl)