Рутенія оцінена Золотов медайлов Словацькой републікы

По двох роках одкладаня з причіны пандемії Фолклорный ансамбель Рутенія, котрый діє в Братіславі, одсвятковав 10-ый юбілей свого існованя премєров нового проґраму з назвов Хырбетом ку горам.

Премєра новой танечно-драматічной інсценації, по котрій слідовала святочна рецепція із русиньсков забавов, одбыла ся в суботу 4-го юна 2022-го року в просторах Култорного дому Дзеркаловый гай в братіславскій містьскій части Петыржалка.

Рутенія святковала з вызначныма гостями

Покровительство над святочным проґрамом з нагоды 10-ой річніці Рутенії перевзяла презідентка Словацькой републікы Зузана Чапутова.

На премєру Рутенії пришли вызначны гості із Словакії, але і споза граніць. Участный быв уповномоченый влады Словацькой републікы про народностны меншыны Ласло Буковскый, ґенералный директор Словацького народного музея Браніслав Паніс ці дирекрка Фонду на підпору културы народностных меншын Алена Котванова.

Якбач найвызначнішым гостьом споза граніць быв професор Павел Роберт Маґочій з Канады, котрого назва книжкы іншпіровала і творців новой танечно-драматінчой інсценації, яка дістала єднаку назву.

На подію пришов і председа Світового конґресу Русинів Штефан Лявинець, державный секретарь сербского Міністерства про людьскы, меншыновы права і соціалный діалоґ Олена Папуґа, членове Світовой рады Русинів за Польщу і Чеську републіку – Андрій Трохановскый і Владислав Гаффнер, представителі Стоваришыня Руска Бурса з Польщі – Наталія Малецька-Новак і Даміан Трохановскый, але і далшы представителі русиньского общественного жывота на Словакії.

Золота медайла про Рутенію

Несподіванка про Фолклорный ансамбель Рутенія пришла по премєрі, кедь на сцену вышли з куртыма приговорами уповномоченый Буковскый і професор Маґочій.

Уповномоченый при нагоді 10-ой річніці уділив ансамблю Золоту медайлу Словацькой републікы. Медайла є „узаньом і подякованьом за роботу, котру ведучі і членове колектіву зробили про розвиток културы і фолклору Русинів на Словакії“.

Золота медайла Словацькой републікы є нагородов Уряду влады Словацькой републікы. Уповномоченый про народностны меншыны єй звыкне од 2017-го року удільовати народностным інштітуціям, колектівам або особам, котры діють в народностнім русі.

Хырбетом ку горам

Інсценація Хырбетом ку горам была за порядком четвертов премєров Фолклорного ансамблю Рутенія, котрый выникнув у столиці Словакії в 2010-ім році. Думку на ісценацію приніс Петро Штефаняк, котрый ансамбель веде од выникнутя.

Танечну режію і драматурґію робив Штефаняк із Славоміром Ондейком, сценарь і режію робив Петро Медвідь. На сцені мож в представліню видіти і Дітячій фолклорный колектів Ґайдошік. Головну роль Николая Бескида – ґрекокатолицького священика, патріота і будителя, котрый інсценаційов проводить помеджі танечны выступы, грає актор Володимір Чема.

Ансамбель Рутенія, котрый є на сцені уж 12 років, приготовлює з новов прємров турне і на выході Словакії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА