Сакральна тематика в творчости Енді Варголя

Музей Модерного Кумшту Енді Варголя в Меджелабірцях 21. грудня/децембра т.р. одкрыє выставу присвячену тому выдатному артисті родом з Пряшівщыны. Тема выставы являт ся дотля рідко стрічаном, понеже Варголя світ знат радше з вынятковых ґрафік баньок поливкы Campbell’s ци найпопулярнійшого в цілым світі напитку маркы Coca-Cola. Тепер буде мож збогатити знаня про сакральны мотивы в його творчости.

Музей наплянувал вернісаж на 18.00 год. в Ґалериі Міста Левоча. Кураторами той цікавой выставы сут Михал Бицко, музейоедуколоґ, емеритний президент Andy Warhol Society і спілоснователь реченого музею, та Мартін Цубяк і Кармен Ціліпова.

В інформациі од музею чытаме, што концепция выставы зосереджат ся на думках візуалізациі і таємниц Енді Варголя. Корол поп-арту як глубоко запертий в собі чловек не афішувал ся зо свойом віром. Не выносил ся стрічами з церковныма достойниками, так як і николи не выносил ся з причыны познаня папы Йоана Павла ІІ. Был запертий і перед найблизшом родином, перед котром не обносил ся зо свойом благодійном діяльністю. Прото выстава вказувала буде як раз на сес вымір варгольовой творчости.

Выстава представляти має найперше тему влияня матери, Юлиі Варголовой, на єй сына. Другій мотив зосереджений буде в обшыри різдвяных свят і інчых церковных праздників, до якых в своій творчости навязувал Енді Варголь. Tеперішня выстава є такой продолжыньом інчой інсталяциі, яка перше вказувала творчіст артисты в наслідстві смерти його матери і того, в якій спосіб прожывал жалобу.

Надале представляна буде творчіст, яка інспірувана была самым Леонардо да Вінчі і його образом «Послідня вечеря». Остатньом частю новоплянуваной выставы має быти мотив креста, точнійше креста з цмонтеря з рідной Миковы, одкале походили Варгольовы родичы.

Подля анонсу з музею, выстава має склонити до рефлексий в часі, коли вірны ждут народин Спасителя. Так само має быти символом проминаня і памяти про люди, маючых влияня на наше жытя, якых уж серед нас ніт.

Выставу буде мож обзерати до січня/януара 2019 р.