Самы бабы

Ґазета для народа – в чыслі 25. за 1912 рік голосит, што в Чехах стало ся штоси страшне. Хлопы выбрали до парляменту писательку – неяку Кунетицку. Выбрана вказала ся быти…бабом.

Віст тота так порушыла цілу нашу редакцию, же мусіли сме си пофольґувати.

Днес вшытко зас маме нарубы. Позміняли сме барз вельо і тепер хлопы і бабы выберают найчастійше послів, котры скоро тіж вказуют ся “бабами”. Нововыбраны, на другій ден по выборі, тратят памят про тото, што скорше обіцяли. Тоты, котры іх выберали тіж хворіют на непамят. Хлопы не памятают навет, де іх порткы.

Уневажніня такого нетрафленого выбору Лемкам штораз то тяжше проходит. Треба ждати, коли тоты што выберали перестанут ся признавати до своіх помазанців. Або будут хотіти іщы веце для себе. Товди зас жадати будут паритета.