«Щыро доношу. Судиме ся!» – понедільок, 20.00 год.

В днешнім проґрамі хімічна справа. Што то сут краплі Гофмана? Ци сут заборонены? Ци мож іх продавати лем в аптиці? А што спільного з краплями має смерт трьох жен в Высовій? Як до того вшыткого односят ся експерты і што рішыт суд? Просиме слухати.

Щыро доношу, што четверта серия не презентує поліцийных рапортів про жытя лемківского населіня в меджевоєнным періоді (тото было змістом першой і другой серий), не будут то тіж збійницкы судовы справы сперед парусот років (тым занимали сме ся в третій). Четверта серия є про тото, чым актуальні люблят занимати ся денекотры Лемкы (і ні, не буде нич про гуляня, співаня і печыня кобасок), а по правді то Лемкыні, а так властиві то єдна Лемкыня – суджыньом ся. На разі занимаме ся выміром справедливости сперед 100 років. Сут то головні обычайовы справы, часом назначены кримінальныма приметами, якы вказуют реляциі і односины в лемківскым соспільстві в передвоєнным періоді.

Вшыткы архівальны проґрамы найдете в радийовых подкастах. До почутя!

Премєра – понедільок о 20.00 год., повторіня о 4.00 год. вночы з понеділька на віторок та о 13.00 год. в найблизшу суботу.