«Щыро доношу. Судиме ся!» – понедільок, 20.00 год.

Днес просиме на обычайову справу. Проблем сперед сто років часто підниманий є і сучасні. Неєдно писмо в тій справі было выпродукуване, а оскражынь кілько… Не до зрахуваня. Но, бо винуватий є тот, хто продал, ци тот, што сой сам до ґарла влял?

Щыро доношу, што четверта серия не презентує поліцийных рапортів про жытя лемківского населіня в меджевоєнным періоді (тото было змістом першой і другой серий), не будут то тіж збійницкы судовы справы сперед парусот років (тым занимали сме ся в третій). Четверта серия є про тото, чым актуальні люблят занимати ся денекотры Лемкы (і ні, не буде нич про гуляня, співаня і печыня кобасок), а по правді то Лемкыні, а так властиві то єдна Лемкыня – суджыньом ся. На разі занимаме ся выміром справедливости сперед 100 років. Сут то головні обычайовы справы, часом назначены кримінальныма приметами, якы вказуют реляциі і односины в лемківскым соспільстві в передвоєнным періоді.

Вшыткы архівальны проґрамы найдете в радийовых подкастах. До почутя!

Премєра – понедільок о 20.00 год., повторіня о 4.00 год. вночы з понеділька на віторок та о 13.00 год. в найблизшу суботу.