Шлезакы як Русины?

Получены Соймовы Комісиі Адміністрациі і Внутрішніх Справ та Нацийональных і Етнічных Меншын оповіли ся в середу 19. жолтня/окробра за одшмаріньом громадяньского проєкту новелізациі закону про нацийональны і етнічны меншыны, котрий мал вписувати до ней шлезску етнічну меншыну, жебы мала такы самы права як мают Лемкы, Караімы, Татары і Ромы в Польщы.

Коли бы были введены новы рішыня, охороном і підпором державы обняты бы были шлезскы традициі і культура та шлезска ґодка (шлезскій язык), заґварнатувана была бы фінансова підтримка на шлезску едукацию. Але не будут. Хоц в 2014 р. під проєктом новелізациі закону підписало ся коло 140 тис. осіб, вельолітні борбы о вызнаня окремости Шлезаків на тот момент не приносят успіхів на высшым адміністрацийным щабли так теперішньой, як і попередньой каденциі Сойму Польской Республикы.

За одшмаріньом проєкту голосувло 22 членів комісиі, против было 13, 3 стримало ся од голосуваня. Над результатом засіданя комісиі голосувал буде іщы Сойм. Мож ся єднак сподівати, же Сойм підтримат рішыня послів ПіС і Кукіз’15 (голосы послів з тых партіі переважыли, одшмаряючы громядяньскій проєкт).

На засіданю президия Комісиі Нацийональных і Етнічных Меншын зголосила внесок покликати підкомісию, цілю детального розсмотріня проєкту. Представник законодавчой ініциятвы – проф. Збіґнєв Кадлубек зо Шлезского Університету, бесідувал, же стараня мают культуровий характер, звязаний з захороніньом культуры – так, як ся оно діє в цілій Европі, а не мают політичной одтени. Посланка ПіС Барбара Дзюк сопротивляюча ся покликаню підкомісиі, арґументувала свою опінію тым, же пропонуване в проєкті вызнаня шлезской меншыны не выполнят сумарично вшыткых критерий етнічной меншыны, котры завершены сут в арт. 2 уст. 3 закону про нацийональны і етнічны меншыны. Подля ней фольклор жытелів Шлеска єст нерозлучном частю польского фольклору […] тіж істория і традиция Шлезка сут нерозлучном частю історичного дідицтва польской нациі.

Проблем Шлезаків в Польщы здає ся быти аналоґічным до невызнаваня русиньской меншыны в Украіні, де тіж част громадян, будучых меншыном, домагат ся своіх прав, а іх жаданя сут іґноруваны.