Шлюб пред дорогом в незнане – 70 процент – субота, 20.00 год.
…ніт, не было уж цілком незнане. Бо тоты першы, якы поіхали до Росиі (в Радяньску Украіну), уж написали листы. І летіли в рідну Тыляву вісткы о новым, радяньскым жытю, як то в Русенка: «Был ту передновок / Од січня до грудня.». Писали і о тым, жебы в ниякым припадку не іхати на тоту «землю обітовану». Мудры Лемкы в листах, якы могли підпасти під цензуру, часто хоснували езоповий язык: писали не просто, але в ріжний спосіб давали зрозуміти, кадиль трафили. І тоты, што лишыли ся на рідній земли, вшытко добрі зрозуміли. І тримали ся той землі, покаль ся дало…
В осени в 1945 році выселяют зас жытелів Тылявы в Радяньскій Союз, тепер уж не на полудньову Украіну, а в Галичыну. Тым разом уж не аґітуют, ани не страшат, як перше, а попросту примусово вывозят. Што там буде? Як там буде? Кадиль іх завезут? Журят ся Лемкы. Знают з листів, же іх родину, іх сусідів уж розсіяли, розметали по ріжных селах, областях… Ци найдут ся зас? Ци зыйдут ся даколи? Певні, з той мысли в дакого родит ся ідея — може, ту, на порозі того незнаного жытя, выдати дівку ци оженити сына? Най бы ся побрали зо своіма, бо не знатя, што там чекат… А може ім, як окремій родині, приділят більше маєтку ци землі? Такє не раз ся трафляло. Даколи так ся побрали тоты, же знали ся, любили ся уж давно, а даколи — і тоты, же цілком єдно другого не знали. Лем жебы оддати ся за свого, за Лемка! Жебы взяти сой жену зо своіх люди… А там – най уж буде, што буде…
Подібно было і в жытю тылявянкы Анны Грешко (з дому – Фучыла). Ішол єй товды двадцетий рік… Власні пришла домів з заробітків з Пряшівщыны. Была осін, традицийна весільна пора, лем шлюб при чеканю на потяг на схід был цілком несподіваний… Як то было? Но-ле, слухайте, она вшытко вам днеска оповіст…
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
