Што дальше з Музейом Лемківской Культуры в Зындрановій?

Музей Лемківской Культуры в Зындрановій діє од веце як 50 років. Його основаня заініциювал Федор Ґоч, котрый початково громадил поєдны памяткы. Днес то скансен з хыжом, кузньом, каплицьом, вітраком, конюшньом, корчмом, але тіж бібліотеком і архівом. Од січня/януара музей буде запертый.

Музей Лемківской Культуры в Зындрановій мусит ограничыти свою діяльніст. Брак одповідніх середків не дозвалят фунґувати інституциі на дотеперішніх условіях. Музей буде запертый в терміні од початку рока до кінця марця 2023 р.

Брак грошів на біжучу діяльніст Музею

«Причыном сут грошы. Як мож легко провірити на сайті Міністерства Внутрішніх Справ і Адміністрациі, рішыньом з дня 14. грудня/децембра 2022 р. музей отримал дотацию на підметову діяльніст в 2023 році о 30% меншу як в 2022 році. Окрем того аж о 50% зменшена была дотация на цільовы задачы, порівнуючы до попередніх років» – подає Богдан Ґоч, ведучый Товариства для Розвитку Музею Лемківской Культуры в Зындрановій.

Разом цільовой дотациі Музей отримал 40 тис. зл на реализацию задач, котрых цілю є охорона, захованя і розвиток лемківской культуровой достоменности. В попередніх роках дотациі выносили одповідньо: 88 тис. зл на 2020 рік, 81 300 зл на 2021 рік та 82 тис. зл на 2022 рік. Того рока Музей хоче за признаны грошы зорґанізувати дорічне свято Од Русаль до Яна, провести артистичный пленер, печатати дві публикациі – річник та пісні і співанкы з околиц Святковой.

Предовшыткым єднак грошы потрібны сут на утриманя і діяльніст єдиниці як музейной інституциі. «Інфляция, векшы ціны товарів, звекшыня мінімального вынагороджыня – при обниженій дотациі ставлят нас тото в барз трудній ситуациі. При такым дофінансуваню, як маме, не сме в силі фунґувати през полных 12 місяців» – пояснят Б. Ґоч.

О проблемах музею Богдан Ґоч на біжучо інформувал представників лемківской меншыны в Спільній Комісиі Уряду та Нацийональных і Етнічных Меншын та експертів, што рекомендуют внескы о уділіня дотациі на реализацию задач Міністром Внутрішніх Справ і Адміністрациі.

«Незалежні од рішыня Міністерства што до нашой дотациі, в сезоні музей буде одкрытый і буде нормальні фунґувал» – ґарантує директор музею.

Вельолітня борба

В аналоґічній ситуациі Музей был перед парома роками. Перше в 2017 році музей ограничыл дни одкрытя, бо дотация была о вельо низша як потребы. Поза сезоном музей одкрывали лем в суботы і неділі.

В 2018 році музей зрезиґнувал з орґанізациі музейного свята Од Русаль до Яна, внескуючы передати грошы на фінансуваня імпрезы на діяльніст музею, жебы могло нормальні фунґувати.

Зас в першых тыжнях 2019 рока музей чысто заперли в звязку отриманьом низшой (33 тис. зл) як внескувана (53 тис. зл) дотациі. Аж черговы неґоцияциі довели до отриманя жаданого фінансуваня.

Товариство для Розвитку Музею Лемківской Культуры в Зындрановій звернуло ся до директора Департаменту Віроісповідань та Нацийональных і Етнічных Меншын МВСіА о інструкциі і поясніня, як уявляют собі діяльніст Музею в найблизшым часі і в якій спосіб Товариство має зактуализувати кошторисы реализациі задач. Покля што остают без одповіди.

Фот. zyndranowa.org