Skansenova – скансены в Малопольщы будут одновлены

Забыткы деревяной архітектуры, зобраны в скансенах на обшыри малопольского воєвідства, будут комплетні одновлены завдякы проєктови Skansenova. Проґрам, в якым уаст бере 8 партнерів, отримал дофінансуваня (коло 9,1 млн зл) з Европейского Союзу.

Як поінформувал Маршалківскій Уряд Малопольского Воєвідства, цілий кошт заплянуваных інвестиций то близко 13,7 млн зл. Грошы розділены будут серед семох партнерів при підпорі Малопольского Інституту Культуры. Лідером проєкту єст Округовий Музей в Новым Санчы, партнерами м.ін. Округовий Музей в Тарнові, Музей Дворы Карвациянів і Ґладышів в Ґорлицях і Музей – Надвісляньскій Етноґрафічний Парк в Выґєзлові та Замок Липовец, дале: Музей Оравскій Етноґрафічний Парк, Скансен в Сідзіні – Музей Народной Культуры, Скансен Добчыці – Музей ім. В. Ковальского.

В рамках проєкту, Сандецкій Етноґрафічний Парк, якій єст частю Округового Музею в Новым Санчы, проведе комплексовий ремонт забытковых будинків в секторах: погіряньскым, дворскым, німецкых кольоністів та лемківскым. Музей Дворы Карвациянів і Ґладышів в Ґорлицях заплянувал консерваторскы роботы в Мазярскій Загороді в Лоси, а тіж перенесіня гын деревяного обєкту і заадаптуваня го на выставовы цілі.

В сумі, в рамках цілого проєкту, проведены будут роботы в 104 забытковых обєктах, в тым штырі з них будут перенесены. 80 обєктів буде достосуваных для потреб інвалідів, змодернізуваных буде тіж вісем постійных выстав.

Цілий кошт інвестициі то близко 13,7 млн зл, а дофінансуваня з ЕС перекрачат 9,1 млн зл. Европейскы фонды походят з Операцийного Проґраму Інфраструктура і Середовиско на рокы 2014-2020, решта то фінансуваня Маршалківского Уряду (9,5%) та інституций культуры і ґмін.

На знимці середина лемківской хыжы в Мазярскій Загороді в Лоси, фот. Ярослав Мазур, архів ЛЕМ.фм 2014.