Голосник

SKANSENOVA выріжнена. В рамках проєкту была перенесена хыжа з Бортного до Лоси

Округовый Музей в Новым Санчы, якій занимат ся медже інчыма популяризуваньом знаня про бывшу материяльну і нематерияльну спадковину Лемковины, отримал выріжніня в 40. едициі конкирсу на Музейну Подію Рока SYBILLA 2019 за проєкт SKANSENOVA, котрого был лідером.

Выріжніня признали сандецкій інституциі в катеґориі Консервация і охорона дідицтва культуры. Нагородили консерваторскій проєкт SKANSENOVA, реализуваный в роках 2016-2019 в одділіню Музею – Сандецкым Етноґрафічным Парку та семох інчых музейных пляцівках в Малопольщы. Музей з Новым Санчы был лідером проєкту.

Проєкт SKANSENOVA закладал шырокій закрес консерватроско-направчых робіт. В сандецкым скансені одновили і забезпечыли близко 90 будинків в лемківскым, погіряньскым, дворскым секторах і секторі німецкых колоністів. Вымінили соломяны дахы, законсервували і заімпреґнували деревяны площыны – што має хоронити перед діяньом атмосферичных факторів та бактериями, поростами і грибами. Деструкты в дереві заступили вставками. При декотрых обєктах треба было узуполнити камінны фундаменты. Скансен має тіж нове огороджыня, част была поведена новым путьом. Важным елементом проєкту было введіня розвязань дозваляючых звиджати неполносправным особам.

Завдякы проєктови SKANSENOVA в Мазярскій Загороді в Лоси станула нова лемкіска хыжа

Окрем Округового Музею в Новым Санчы, проєкт SKANSENOVA реализувал тіж м.ін. Музей Дворы Карвациянів і Ґладышів в Ґорлицях. В рамках задачы ґорлицкій музей транслокувал і заадаптувал на потребы одділіня Мазярска Загорода в Лоси памятникову хыжу з 1928 рока з Бортного до Лося. Находит ся в ній бюро лосяньского одділіня та варштатово-експозицийны просторы з санітарным заплечом.

Конкурс SYBILLA реализує Нацийональный Інститут Музейництва і Охороны Памятників під покровительством Міністра Культуры і Нацийональной Спадковины. Його цілю є вказувати і промувати найліпшы ініциятивы реализуваны польскыма музеями. Торжественны ґалі лавреатів проходят в важных для культуры місцях, м.ін. в Театрі Великым – Нацийональній Опері в Варшаві, Музею Істориі Польскых Жыдів POLIN і інчых.

Оголошыня тогорічных результатів конкурсу Sybilla 2019 одбыло ся в Міністерстві Культуры і Нацийональной Спадковины, з санітраных оглядів – без участи публикы.

Фот. Роботы в Лоси при транслокуваній хыжы з Бортного.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі