Саноцкій Дім Культуры просит жытелів саноцкого повіту в віку од 30 до 65 років до участи в безплатных театральных варштатах, котры будут проходити в терміні 19.-24. жолтня/октобра.
Варштаты закінчат ся черговым показом спектаклю «Єм памятю» 24. жолтня/октобра о 19.00 год. на дошках Саноцкого Дому Культуры. Режысером пєсы є Войцєх Фаруґа. Спектакль «Єм памятю» выникнул як ефект театральных стріч, котры прошли в минулым році в Ґорлицкым Центрі Культуры.
І єдны, і другы варштаты, подібні як і сама пєса, посвячены сут темі культуры і істориі Лемків. З той причыны до участи прошены сут особливі представникы лемківской меншыны або особы заінтересуваны лемківском темом.
Проєкт «Лемківска Одисея» был реалізуваный в 2019 році в Ґорлицях. Аматоры вєдно з професийныма акторами зреалізували пєсу на основі історий зобраных вчас спільных стірч і тереновых прогульок згідні з ідейом community theatre. Є то анґлицкій модель театру локальной соспільности. Твореный є на основі істориі членів даной ґрупы з особливым значыньом.
Варштаты в Саноку будут проходити в аналоґічный спосіб. Вести іх будут Катажына Павловска і Якуб Кручек вєдно з режысером Войцєхом Фаруґом. На 19. жолтня/октобра заплянували запознавчый варштат, пак од 20. жолтня/октобра проходити будут властивы варштаты, звінчены показом пєсы 24. жолтня/октобра.
Проєкт «Лемківска Одисея. Обізд» реалізуваный є в рамках проґраму Театр і Танец 2020 Міністерства Культуры і Нацийональной Спадковины.
Коментарі