СКР жадать безодкладне заставліня перзекуцій Русинів на Україні. Звертать ся до словацького премєра

Світовый конґрес Русинів прияв выголошіня, котрым звертать ся до премєра влады Словацькой републікы Едуарда Геґера, і жадать безодкладне заставліня перзекуцій Русинів на Україні, як і признаня їх народностных прав.

Конґрес звертать ся до словацького премєра з той причіны, же орґанізація є реґістрована якраз на Словакії.

До відома СКР зажене тото выголошіня і презідентці Словацькой републікы Зузані Чапутовій, міністрови загранічных діл і европскых справ Словацькой републікы Растіславови Качерови, а предсидательці Европской комісії Урсулі фон дер Леєн.

Подля нашых інформацій членове Світовой рады Русинів за окремы державы пропонують выголошіня загнати і властям своїх держав.

Приносиме вам цілый текст выголошіня, котре є підписане председом Світового конґресу Русинів Штефаном Лявинцьом, і котре голосованьом членів per rollam схвалила Світова рада Русинів.

Выголошіня Світового конґресу Русинів

Світовый конґрес Русинів, як головна орґанізація Русинів і русиньскых орґанізацій на цілім світі

1. вітать

приятя закона о народностных меншынах Верьховнов радов Україны з дня 13-го децембра 2022-го року, як єдно з условій про вступ Україны до Европской унії і выражать надію, же нова леґіслатіва дасть ґаранції про етнічный і културный розвиток вшыткых народностных меншын на Україні, включно Русинів, котрым Україна на тот час меншыновы права не признавать,

2. выражать знепокоїня

односно резултатів разій публікованых Службов безпекы Україны з дня 14-го децембра 2022-го року, в рамках котрых были конфішкованы і артефакты русиньской културы, меджі нима были русиньскы співанкы, часописы і русиньска сімболіка – флаґ і гімна Русинів, котры были неоправдано означены як доказы діверзії прямованы проти теріторіалной цілости Україны, і наперек тому, же релевантны русиньскы орґанізації на Україні і в іншых країнах єднозначно одсудили войну, означіли за аґресора Російску федерацію, і выразили солідарность з Українцями і вшыткыма далшыма народностями, котры жыють на Україні,

3. жадать председу влады Словацькой републікы,

жебы Словацька републіка звертаючі ся до Україны і звертаючі ся до Европской унії

а) вызвала на безодкладне заставліня перзекуцій Русинів жыючіх на Україні,

б) жадала признаня меншыновых народностных прав про Русинів жыючіх на Україні.

Підпис:

Др. Штефан Лявинець, председа СР СКР