Словацька влада схвалила Ґуралів за народностну меншыну

Ґуралі стали на Словакії новов, вже 15-ов народностнов меншынов на Словакії. На пропозіцію председы влады Роберта Фіца о тім вырішыла влада Словацькой републікы на выїздовім засіданю в Червенім Клашторі в середу 29-го януара 2025-го року. Інформовала о тім аґентура TASR.

„Про Ґуралів то сатісфакція, бо ґуральска громада населять цілу северну Словакію, од Старой Любовні аж по вышню Мораву,“ повів староста села Ждіар Павол Бекеш з тым, же хотять, жебы ґуральска култура всокотила ся і про далшы ґенерації.

Звернув увагу, же вдяка офіціалному вызнаню за народностну меншыну будуть годны на свої актівности здобыти фінанції із державного розрахунку, і далше так розвивати свою културу. Хотіли бы наприклад фінанцовати фолклорны колектівы.

„Мы уж на Словакії сьме на списку нематеріалной културной дідовизны, і вєдно з Поляками і Чехами (Ґуралями з тых держав, позн. ред.) хочеме ся записати до списку UNESCO,“ додав Бекеш.

При посліднім списованю жытелів із 2021-го року на Словакії приголосило ся ку Ґуралям, хоць на то не мали окремый стовпчік у формуларі, 5273 людей. З того лем 537 собі тоту народность дало при першім вопросі, аж 4736 у другім вопросі на народность.

Словацька републіка має одтеперь 15 офіціално вызнаных народностных меншын. Дотеперь послідньов вызнанов была вєтнамска меншына, котру признала урядницька влада Людовіта Одора у 2023-ім році.

Премєр Роберт Фіцо думать, же офіціалне вызнаня про Ґуралів буде значіти много. „Выходить то наприклад з того, же ґуральска меншына стане членом Рады влады Словацькой републікы про народностны меншыны.“ Председа влады не похыбує о тім, же Ґуралі як офіціална народностна меншына будуть значнов міров давати вклад до розмаїтости Словацькой републікы.

На соціалній сіті рішіня владного кабінету окоментовав і уповномоченый влады Словацькой републікы про народностны меншыны Акош Горонь. „Ґуралі, вітайте меджі нам!“ написав, причім додав до посту мотузок на баданя о Ґуралях, котре робив Інштітут Матєя Бела.

Фото: FB/Múzeum ľudovej kultúry v Lendaku.