Словацькый депутат: Русины на Україні мають быти вызнаны

На україньскім порталі УКРІНФОРМ быв публікованый розговор Андрія Лавренюка з депутатом Народной рады Словацькой републікы і єдночасно председом парламентного Загранічного выбору – Франтішком Шебейом, членом коалічной партії Most-Híd.

Лавренюк зо Шебейом бісідує як з єдным із найвешкых фаховців в областях европской і евроатнантічной інтеґрації. Звідать ся го на позіцію Словаків односно Україны і Росії, на односины міджі Українов і Словакійов, но бісідує з ним і о сучаснім стані Европской унії і їй будучности. Не выхаблять ани проблематіку реформ на Україні, конфлікт на выході державы, ці вопрос Крыма.

Окрім того, редактор говорить о тім, же „на Україні вже не раз были заставлены пробы выкликати конфлікты на основі народностной ідентічности Русинів, котры мають сполочну історію зо Словаками…“

Франтішек Шебей редакторови припоминать, же на Словакії суть Русины вызнанов народностнов меншынов, што їм давать вшыткы права, включно языка і народностного школства. Словацькый депутат так само говорить, же то, же на Україні не суть Русины вызнаны, видить як проблем у сфері людьскых прав і прав народной ідентічности „давного народа“.

„Я сам думам, же Русины мають быти вызнаны як народностна меншына на Україні, як то было зроблене і односно представителів іншых народів,“ продовжує в розговорі Шевей.

Франтішек Шебей

Франтішек Шебей (1947) є родаком із Братіславы. Закінчів псіхолоґію на Філозофічній факулті Універзіты Коменьского в Братіславі. До року 1992 робив в рамках псіхолоґічных досліджінь. В рр. 1990 – 1992 быв членом презідії Словацькой академії наук. В тых самых роках быв і депутатом Федералного згромаджіня Чехословакії (федералный парламент) і председом Загранічного выбору Сеймовні народів Федералного згромаджіня (єдна із комор федералного парламенту). В рр. 1998 – 2002 быв депутатом Народной рады Словацькой републікы і председом парламентного Выбору про европску інтеґрацію. Од 2010-го рока аж дотеперь є знова депутатом словацького парламенту і єдночасно председом Загранічного выбору.

Жрідло фотоґрафії: most-hid.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА