«Слово» – 10-та неділя по Сошествії Святого Духа – неділя, 9.00 год.

Того тыждня сьме праздновали память святых мучеників Макавейскых і старця Єлеазара. Хто были тоты люде а што можуть повісти до нашого жывота? Жыли в добі, котра можеме повісти была подобна і днешній добі.

Выбраный народ одхылив ся од віры в правдивого Бога ку ідолам, многы приїмали і вплив ґрецькой културы з єй аморалностьов. В тім часі в Сирії повставать царь Епіфан Антіох, котрый силовав жыдів до одступництва од Бога. Перед началника царя філіпа быв приведженый і священик Єлеазар, котрому як знак одпаду од Бога подавали мясо зо свині. Накілько то не хотів, быв одсудженый на смерть. По дорозі му многы погане радили взяти інше мясо і а перед началником царя указати, же взяв з недоволеного мяса.

Но Єлеазар таку раду одверьгнув. Не хотів быти причінов погыбелі про многых, котры бы думали, же і він одпав од Бога. Тым і про нас є прикладом небезпеченства дати погоршіня другым а тыж, же не треба робити компромісы зо злом, але твердо стояти у вірности Богу і Його слову. По смерти Єлеазара взяли на мукы сім братів учеників Єлеазара і їм мати Соломонію.

Они твердо в надії на воксресіня перетерпіли мукы, підкріпляны свойов матірьов. Она не хотіла сохранити жывот своїм сынам за ціну одпаджіня од Бога. Хотіла сохранити їм правдивый вічный жывот. Так святы мученикы стали ся мучениками оперед святых новозавітных мучеників.

Най і нам выпрошують у Господа благодати твердо стояти на стороні Божого закона і за ціну высміваня, понижованя і може і смерти за імя Хріста і його слово. Слава Ісусу Хрісту!

В неділю, 16. авґуста 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. авґуста о 12.00 год. і 17. авґуста о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА