«Слово» – 10-та неділя по Сошествії Святого Духа – неділя, 9.00 год.

Днешнє слово Євангелія нам говорить о выздравліню або ослободжіню од демонів. Такых выздравлінь Ісус Хрістос зробив много, но предсі є в чімсь інше, бо нас хоче научіти дачому барз важному.

Коли Ісус сходить з горы Тавор, де ся переобразив перед трьома своїма учениками, долов ся зышло много народа. Бо там єден чловік мав сына, котрого трапив нечістый дух. Як тот чоловік увидів Ісуса пришов ку ньому зо словами: привів єм свойого сына ку твоїм ученикам, но они го не могли выздравити. А тот нещасливый отець додав: кедь дашто можеш, помож нам. Но Ісус ту реаґує дость твердо: О, чуджоложне і выкривлене поколіня, доколи іщі буду з вами, доколи вас буду терпіти, приведьте го ку мі.

Ту ся можеме позаставити, чом Ісус реаґує так твердо, коли чує слово того тажко пробованого чоловіка, котрого дітина так терпить? Бо тот чоловік тыма словами засівать невіру і похыбованя меджі народом. Бо коли ученикы были безсилны, та може ани їх учітель ту нич не зможе. Може є то такый род демонів, же уж нихто не зможе помочі. Ани Ісус. А тыма думками, тыма зеренками міг посіяти меджі народом похыбованя: Є то тогды Месія? Хрістос? Коли сі не дасть рады з тыма нечістыма духами?

Зато Ісус называть їх выкривленыма, бо коли чоловік зыйде з простой правой дорогы, найде ся на шырокім пространстві поблуджіня. То діяло ся з Ізраільскым народом цілу історію. Посмотьме лем, коли вышли з Еґіпта, были свідками тількох чудесных діл, а предсі як легко на тото забыли, выготовили собі злате теля. В часі, коли Мойсей на горі приїмав Божы заповіді. Тогды говорить Бог ку Мойсейови: Як скоро выбраный народ зышов з дорогы. Так само ту і Ісус Хрістос говорить: Я ку вам говорю через свої слова, сьте свідками тількох чудесных діл а іщі все нерозумите, все іщі перебывате в невірстві або у фалшывій вірі в силу зла?

Дорогы радіослухачі, тото є тым посолством того днешнього слова, котре нам говорить о небезпеченстві увірити в силу зла. Коли чоловік находить ся в тажкій сітуації, або як видить, як зло якбы перемагало, видить утискованя Церькви, погорджіня основныма моралныма прінціпами владарями того світа, медіями. Тогды діавол старать ся підсунути думку: справды Бог мать вшытко у своїх руках, справды належыт Йому посліднє слово?

Зато і днешнє слово закончує словами: Сын чоловіка буде выданый до рук людей, буде убитый, што указує на якбы безсилность, на силу зла. Но додавать слово: але на третій воскресне. І мы памятайме на тото днешнє слово і на напомянутя, котре нам наш люблячій Спасистель посылать, жебы сьме не вірили в силу зла, але в силу добра. Слава Ісусу хрісту!

В неділю, 9. авґуста 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. авґуста 2026 р. о 12.00 год. і 10. авґуста 2026 р. о 2.00 год. за русиньскым часом.