«Слово» – 12-та неділя по Сошествії Святого Духа – неділя, 9.00 год.

В днешнім слові чуєме вопрос, котрый є найважнішый, найосновнішый в жывоті чоловіка на тій землі. За Ісусом приходить даякый молодый чоловік і звідує ся: Учітелю добрый, што мам робити, жебы-м набыв вічный жывот?

Як розділне є то слово од сітуації, коли за Ісусом пришов даякый чоловік, і говорить: Учітелю, накаж мойому братови, жебы ся зо мнов поділив о наслідтво по родічах. Ту чуєме о вопросі як набыти вічный жывот, а ту стараня як вырішыти спрічку двох братів о земный маєток, фалаточок землі, ці даяку іншу цінность по родічах. Тамтому Ісус повів: Чоловіче, хто ня установив за ділителя або примірителя меджі вами. І Ісус напоминать: Мерькуйте, жывот чоловіка не залежный од того, хто кілько того мать.

А тому, котрый давать вопрос як быти учасником вічного жывота, Ісус одповідать: Коли хочеш войти до жывота, дотримай заповіді. Но тот молодый чоловік ся звідує: котры заповіді. А Ісус йому тепрезливо і охотно одповідать, бо видить щірость в тім чоловікови: Не убий, не чуджолож, не крадь, не свідч фалшыво, оддай честь отцю і матери. І свого ближнього будеш любити як самого себе.

Ісус ту говорить о другій частині декалоґу, котра поїднавать о любви ку ближньому, што Ісус наконець згорнув словами: а свого ближнього як самого себе.

Другый важный момент днешнього слова є: што доброго мам робити? Тот чоловік є заміряный на добро, роздумує о добрі. Сьме чули недавно в нашых призадумах над євангелійом о отцьови, котрый просив за здравя сына, трапелного нечістым духом в часі нову місяця. Як тот отець зареаґовав, коли ученикы не могли йому допомочі. Обертать ся на Ісуса: кедь можеш, помож нам. А Ісус реаґовав дость строго: О невірне, і выкривлене поколіня, доколи буду з вами? Доколи будете вірити в силу зла? А того сьме свідками, же чоловік много раз бере зло як средство ку набытю выгод про себе. Выхоснованя будьякого средства і планого на набытя ціля ся бере як дашто нормалне.

Чоловік є заміряный на зло. А тот чоловік є заміряный на добро. Што доброго мам робити?… А коли тот чоловік одповів: тадь лем тото? Я тото вшытко дотримав од маленька. А Ісус йому повів: іщі єдно тобі хыбить… А тот чоловік собі думав, же Ісус йому дасть іщі даяку з його погляду легоньку заповідь, кора про нього не буде проблем і буде мати так повісти вічный жывот уж в кішені. Но Ісус йому повів: Ідь, продай што маш, дай бідным і будеш мати богатство в небі.

А тот чоловік одышов смутный. Як пришов з великым натхніньом, запаліньом за Ісусом. Так теперь одходить спущенов головов і смутный. Што ся стало? Чом нараз така зміна. Ісус йому одкрыв єден його проблем, котрый стоїть на дорозі прямованя до вічного жывота. А то є привязаность ку тому земному маєтку. То была його скрыта хворота, котру Ісус выявлять, і хоче подати йому лік: то є ослободжіня. А тото уж ніг стерпіти тот молодый чоловік. А Ісус йому не повів лем: ідь. продай, што маш і дай бідным. Збав ся того земного маєтку. Но Ісус додав. Ослободь ся од привязаня, котре тя тримать в рабстві через то, же поможеш тым, котры то потребують, а што ті буде зараховане як діло зроблене мі Самому. А ку тому додав: А будеш мати богатство в небі.

А як Ісус видів, як одходить смутный, повів ученикам: Як тяжко є богатому войти до царьства небесного. Но ученикы зачудованы, тадь тот чоловік пришов такый надхненый про набытя вічного жывота. Та хто може быти потм спасеный? А Ісус їм повів: У людей то быти не може, но у Бога вшытко може быти.

Тоты послідні слова днешнього Євагелія нас наповняють великов надійов. Ісус не догасить тот гаснучій ґнотик, ани не доломить нодломлену паліцю. Так і тот чоловік мать можность прийти, змінити свій жывот, робити покаяня – зміны думаня в одношіню ку своїй привязаности ку земному. Так давать принагоду каждому, бо хоче спасіня каждого. Кличе, напоминать, но решпектує слободну волю чоловіка.

Дорогы радіослухачі, тото слово є адресоване ку нам: Говорить нам, же найважнішый вопрос є як набыти вічный жывот. Дотримованя заповідей. Тыж напоминать перед небезпеченством привязаности ку земному, але і о тім, жебы не тратити надію. А коли є чоловіку тяжко, чути тото слово о ослободжіню, розвязаню з привязаности. Звучіть ту слово потіхы: А будеш мати богаство в небі. Слава Ісусу Хрісту!

В неділю, 23. авґуста 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. авґуста 2026 р. о 12.00 год. і 24. авґуста 2026 р. о 2.00 год. за русиньскым часом.