Образный приклад о чоловікови царьови, котрый приготовляв свадьбу свойому сынови, нам говорить о Богу, котрый кличе каждого до свойого царьства. До вічной радости, блажености – образ свадьбы, гостины.
Каждый чоловік є покликаный. Говорить о великій терпезливости Бога із чоловіком. Посылать своїх рабів, коли є вшытко готове, жебы повісти запрошеным: подьте. Но їх реакція є, же єдны не хотять ани чути о Богу, о Його царьстві, о вічности – то є образ тых, котры хопили його рабів і поганьбили наперед і убили. Далшы суть тоты, котры суть мірнішы в порівнаню із першыма – то суть тоты, котры не мають час думати на вічность, на небо, на пекло, на душу, бо мають іншы, про них важнішы інтересы. Єдны ідуть на поле – образ роскоші жалудка і тілесных насолод; другы на свої торгы – образ привязаности ку вшыткому земному – богатство, слава, пінязі, карьєра. Такы не мають час на то, жебы думали о вічности, о своїй душі. Страсти тіла і світа затемнюють їх погляд і крадуть у них вшыток час. А наконець нам образный приклад говорить о чоловікови, котрый хоць пришов на свадьбу, но без належного облечіня. Того царь называть не даякыма грубыма словами, але говорить: Приятелю, як же ты пришов без належного облечіня? Репрезентує тых, котры на розділ од першых двох прияли тото запрошіня – то є увірили, но не мали діла подля віры. Словами гововорив гей, Господи, но ділами, своїм жывотом говорив дашто інше. Мав лем вонкашню маску хрістіана, но не быв ним і своїм жывотом. Ісус закінчує образный приклад словами: Много є закликаных, но мало выбраных.
Тото выбраня залежыть не од Бога, але од чоловіка. Бог хоче спасіня каждого, каждого кличе, але чоловік свойов слободнов вольов може або поставити ся неприятельскы ку тому запрошіню, або выгварьков або фалшывостьов – то є лем вонкашнім словом без внутрішнього пересвідчіня без діл жывота. Такы суть покликаны, но не выбраны, бо самы ся вылучіли. Або прийме щіро і словом і ділом давать доказ, же хоче прияти тото запросшіня. Ку котрій катеґорії належыме мы? Одповідь є на нас. Слава Ісусу Хрісту!
В неділю, 22 септембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 22 септембра о 12.00 і 23 септембра о 2.00 год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі