«Слово» – 15-та неділя по Сошествії Святого Духа – неділя, 9.00 год.

В днешнім слові на неділю по Воздвигнутю Святого Креста нам в євангелію Ісус Хрістос говорить: Хто хоче іти за мнов, най одрече ся самого себе, возьме свій крест і мене наслідує.

Пережываме тыждень, коли выставленый по нашых церьквах святый крест. Крест, котрый быв знаком понижіня, проклятя. Смертьов Ісуса на нім ся став знаком побідным. А так тот праздник не є праздником смутку над терпіньом Хріста, але є праздником радостным. Бо через крест нам Ісус Хрістос подаровав побіду, подаровав слободу. Тото слово нас учіть як маме смотрити і на наше крест, як на прілежытость іти за Хрістом.

Днешній день Свята Церьков празднує память святого мученика Євстатія, котрый наповнив своїм жывотом тото днешнє слово. Быв то славный римскый воєвода. Увірив в Хріста по чудесній стрічі з Ним. Дав ся покрестити і з цілов родинов переніс тажке выпробованя. В єднім моменті стратив вшытко – жену, дітей, маєток. Приголосив ся до службы як послідній бідак. Так пережыв 16 років. Терпеливо каждый день зношав тот свій крест без дудраня на Господа Бога, але з одданостьов Божій волі. Як перешов тот час, Господь його прославив уж ту на землі. Знова ся став воєдом, переміг битку проти Ріма. Знова ся стрічать зо своїма сынами, о котрых собі думав, же уж не жыють. А тыж ся зышов і зо свойов женов, котра чудесным способом была уратована перед рабством. Но їх земна радость не тырвать довго. Належало іщі далше нести крест на мукы, жебы прияти мученицькый вінець. Євстатій несе свій крест аж на Голгофту свойого жывота, там приймать одміну вічной славы.

Наслідуйме і мы того великого святого, берьме на себе каждый день свій крест і крачайме за Хрістом. Слава Ісусу Хрісту!

В неділю, 3. октобра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. октобра о 12.00 год. і 4. октобра о 2.00 год. за русиньскым часом.