«Слово» – 18-та неділя по Сошествії Святого Духа – чудесный рыболов – неділя, 9.00 год.

Кедь Ісус Хрістос приходить ку Ґенезаретьскому озеру, видів там множества народа, котрый го тиснув, бо хотів чути його слово. Так насів до лодькы, котра належала Сімонови Петрови і учів.

Потім говорить Сімонови Петрови: Спустьте сіті до глубшой воды. Коли він поясняє, же днешньой ночі ся натрапили без выслідку, но додав: На твоє слово я так зроблю. А поїмали велике множество рыб. Петро втогды сі усвідомлять великость той сітуації, і же перед ним стоїть Владыка сотворіня. Падать на коліна а просить Ісуса: Ідь од мене, бо я грішный чоловік. Но Ісус му говорить: Одднесь будеш ловити людей. Они зохабили вшытко а ішли за Ним.

Тото євангеліє нам прекрасно вказує, же кедь чоловік не мать Божого благословліня, втогды вшытко його мозоліня є даремным. Не мать успіху ани ціны про вічность. Але коли є Боже благословліня, якый великый розділ. Яке множество рыб поїмали.

Так і мы слухайме з радостьов Боже слово, што ку нам Господь говорить, ці на Богослужіню або і дома при чітаню. А не лем слухайме, але і старайме ся выповняти. Як Петро чув слово: Спусть сіті, а він выповнив. Потім приходить выслідок.

А выпрошуйме до каждого діла, котры робиме Боже благословліня. Бо Ісус повів на іншім місці: Без мене нич не можете зробити. Але Апостол Павел, выповнюючі тото слово, додав: Вшытко можу в Тім, котрый мене підкріплять. На й і ку нам односить ся тото слово. Слава Ісусу Хрісту!

В неділю, 20 октобра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 20 октобра о 12.00 і 21 октобра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА