«Слово» – 18-та неділя по Сошествії Святого Духа – неділя, 9.00 год.

Ісус Хрістос приходит ку Ґалілейскому озеру. Много людей ся там посходило, жебы слухати його слова. А то аж тисли ся ку ньому, жебы ліпше чули. Він вошов до лодькы, котра была Сімонова і порпосив трохы одплавати, а так учів народ.

По закінчіню говорить Сімонови: Oдплав до глубшой воды і спусть сіті. Но тот реаґує: Mы цілу ніч ся намагали, а нич не хопили, но кeдь ты кажеш – я то зроблю. А кедь послухав, поїмали тілько рыб, же аж сіті ся торгали. А наповнили і другу лодьку. Потім повів Ісус Сімонови Петрови: Не бій ся, бо од теперь будеш ловити людей.

Тото слово нам указує, же кедь они ся намагали самы, без Хріста, не мали успіху. А як Він їм дав своє благословліня, втогды і безголосны рыбы послухали голос Сотворителя і самы наповнили сіті.

Ісус давать тоту лекцію своїм будучім апостолам, жебы при ловліню людей до сіті Божого царьства все памятали на послухняность його слову, а же лем з його благословліньом будуть мати успіх. Бо ловити рыбы значіло ловити про смерть, а ловити людей до сіті Божого царьства значіло ловити про жывот, жывот вічный.

Тыж то указує нам – быти послухняны слову Господа, а робити вшытко з Божым благословліньом. Бо кедь хочеме своїма силами, не буде успіху. А де є Боже благословліня, то ай кебы ся нам ставляли до дорогы різны перешкоджіня, наше діло буде успішне. Слава Ісусу Хрісту!

В неділю, 11. октобра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. октобра о 12.00 год. і 12. октобра о 2.00 год. за русиньскым часом.